Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 872 Hüküm no: 1140 Orijinal metin no: [137b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühani bt. el-Hâc Ali Efendi’nin, süs ve ev eşyalarını kızı Meryem bt. el-Hâc Hasan’a hibe ettiği Husûs-ı âti’l-beyânın mahallinde tahrîri iltimâs olunmağın kıbel-i şer‘-i mutahhardan mevlânâ keşfî Mustafa Efendi irsâl olunup ol dahi mahmiye-i İstanbul’da el-Hâc Ferhad mahallesinde el-Hâc Hasan b. Abdullah’ın sâkin olduğu menzile varıp zeyl-i vesîkada muharrerü’l-esâmî olan müslimîn huzûrunda akd-i meclis-i şer‘-i şerîf eyledikde merkūm el-Hâc Hasan’ın zevcesi olup zâtı ma‘rifet-i şer‘iyye ile ârifân Mehmed Efendi [b.] İbrahim el-İmâm ve İsmail Çelebi b. Mehmed el-Müezzin ta‘rîfleri ile mu‘arrefe olan Ümmühâni bt. el-Hâc Ali Efendi nâm hâtun meclis-i ma‘kūd-ı mezbûrda sadriye kebîre kızı olup zâtı şâhidân-ı mezbûrân şehâdetleri ile mu‘arrefe olan işbu bâ‘isetü’l-kitâb Meryem bt. el-Hâc Hasan nâm hâtun mahzarında ikrâr ve takrîr-i kelâm edip eşyâ-i memlûkemden üçer ayaklı bir çift la‘lî küpe ve birer ayaklı bir çift yâkut küpe ve üç yüz akçe dirhem gümüşden [138a] masnû‘ iki sîm raht kuşak ve bir mücevher kuşak ve üç yüz dirhem gümüşden masnû‘ bir buhurdân ve bir sorguç ve bir inci enselik ve on beş miskāl altından masnû‘ bir ön kuşak ve yetmiş miskāl altından masnû‘ bir çift bilezik ve beş aded atlas kaftan ve bir dîbâ kaftan ve üç atlas entari ve dört aded serâser yorgan ve bir seccâde ve dört serâser döşek yüzleri ile ve on iki serâser yastık ve üç yan keçesi ve bir orta keçesi ve iki kebîr kaliçe ve iki yemeni yorgan ve on beş aded sahanımı mukaddemâ cihâz için kızım merkūme Meryem’e hibe ve temlîk ve teslîm ol dahi meclis-i hibede ittihâb ve kabûl ve kabz ve tesellüm eylemişidi, hâlâ yine eşyâ-i memlûkemden yirmi aded beledî yastık ve bir orta keçesi ve dört yan keçesi ve iki kebîr kaliçe ve elli aded sahan ve on tencere ve sekiz beledî döşek ve on altı minder ve on altı yorgan ve on aded keçemi dahi merkūme Meryem’e hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede ittihâb ve kabûl ve kabz ve tesellüm eyledi, ba‘de’l-yevm eşyâ-i memlûkenin mecmû‘u kızım merkūme Meryem’in mülk-i mevhûbudur keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb ve tahrîr ba‘dehû ma‘an irsâl olunan Mehmed b. Ramazan ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Fahrü’l-akrân Receb Ağa b. Ali, Hasan Efendi [b.] Nasuh, eş-Şeyh Mehmed Efendi [b.] Mehmed, el-Hâc Ahmed b. el-Hâc Said, Ferhad Beşe b. Abdullah, Ahmed Çelebi b. Abdullah.