Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 73 Hüküm no: 63 Orijinal metin no: [27-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli Bey’in kölesini azat ettiği Oldur ki, Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin Veli Bey b. Abdullah meclis-i şer‘-i hatîr-i lâzımü’t-tevkīrde hâmilü’l-kitâb orta boylu açık kaşlı boynunun sağ yanı salık ön dişi gedik kumral sakallı Hasan nâm abd-i memlûkü mahzarında takrîr-i kelâm ve ta‘bîr-i merâm edüp mezbûr kulum Hasan’ı hasbeten lillâhi’l-azîm ve taleben li-merzâti’r-Rabbi’r-Rahîm malımdan âzad ettim. Bundan sonra sâir ahrâr-ı Müslimîn gibi olsun dedikde mukırr-ı mezbûrun vech-i meşrûh üzre cârî olan ikrârın el-mukarru lehu’l-merkūm Hasan, vicâhen tasdîk ve şifâhen tahkīk etmeğin vâki‘-i hâl gıbbe’t-taleb ketb ve tâlibi yedine li-ecli’t-temessük def‘ olundu. Tahrîren fî-evâhir-i Cemâziyelâhir li-sene erba‘a ve işrîn ve elf. Şuhûdü’l-hâl: Mehmed b. Mustafa el-muhtesib, Hüsrev b. Abdullah, Ahmed b. Turgud, Ali b. Abdullah, Sefer b. Receb ve gayruhum mine’l-hâzırîn