Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 873 Hüküm no: 1141 Orijinal metin no: [138a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Veli’nin, evini turnacılara ait para vakfına istiğlâl yoluyla sattığı Mahmiye-i İstanbul’da Haraç[ç]ı Muhyiddin mahallesi sükkânından olup hâlâ Kütahya kadısı olan Şer‘iyyâtî Mehmed Efendi b. Veli meclis-i şer‘-i şerîf-i hatîr-i lâzımü’t-tevkīrde dergâh-ı âlî yeniçerileri odalarından yeni odalarda vâki‘ olup Turnacılar zümresine mahsûs olan odanın nukūd-ı mevkūfesine bi’l-fi‘l mütevellî olan bâ‘is-i hâze’l-kitâb Tülbentçi el-Hâc Mehmed Çelebi b. el-Hâc Mustafa nâm râcil mahzarında tav‘an ikrâr ve i‘tirâf edip zikri âtî akdin sudûruna değin silk-i mülk-i sahîhimde münselik mahalle-i mezbûrede vâki‘ bir tarafdan merhûm Hüseyin Çavuş veresesi mülklerine ve bir tarafdan Canbaz İbrahim Beşe mülküne ve bir tarafdan Receb Çelebi nâm Yesârî mülküne ve bir tarafdan tarîk-i âma müntehî dâhiliyye ve hâriciyye tahtânî ve fevkānî büyûtu müştemil cemî‘ mülk menzilimi beş yüz esedî guruşa merkūm el-Hâc Mehmed Çelebi’ye tarafeynden îcâb ve kabûlü hâvî bey‘le bi tarîki’l-istiğlâl bey‘ ve teslîm edip ol dahi bi’t-tevliyye mâl-ı vakf-ı mezbûr ile vakıf için iştirâ ve kabûl ve tesellümden sonra semen-i merkūmu tamâmen ahz u kabz edip ba‘de’t-tahliyyeti’ş-şer‘iyye ve’t-tekābuzi’l-mer‘î menzil-i merkūmu târih-i kitâb şehrinin on beşinci gününden bir sene tamâmına değin yetmiş beş esedî guruşa mütevellî-i mezbûr bana îcâr ve teslîm edip ben dahi istîcâr ve kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Cerâ zâlik ve hurrire fi’l-yevmi’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Çelebi Başkorucu, el-Hâc Mehmed Reis b. ( ) er-Râcil, Hüseyin Efendi Kâtib-i oda-i mezbûre, bâzirgân Mehmed Çelebi er-Râcil, Üveys Beşe Ser-oda hâlâ, Mustafa Çavuş.