Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 75 Hüküm no: 68 Orijinal metin no: [29-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kumru v. Ahi’nin menzil ve bağdaki hissesini satması Vilâyet-i Anadolu’da Arabkir Sancağı’na tâbi‘ Eğin nâm kasaba sükkânından olan Kumru v. Ahî nâm Ermeni meclis-i şer‘i hatîr-i lâzımü’t-tevkīrde işbu bâ‘isü’l-kitâb Hortik v. Umurcan nâm Ermeni mahzarında bi’t-tav‘i’s-sâf ikrâr ve takrîr-i kelâm edüp silk-i mülkümde münselik olup kasaba-i mezbûrede vâki‘ bir tarafı Mehmed Bey mülkü ve bir tarafı Ramazan Çelebi mülkü ve bir tarafı Yusuf Bey mülkü ve bir tarafı tarîk-ı hâs ile mahdûd ve mümtâz olan mülk menzilimi babam hâlik-i mezbûrdan karındaşım Ahî nâm Ermeni ile ale’l-iştirâki’s-seviy müşterek olduğumuz mülk menzilden ve mülk bağdan nısf hissemi mezbûr Kumru’ya [Hortik’e] iki yüz aded riyâlî guruşa ve bir kaftan bin akçe kıymetli ve bir çuka ferâceye bey‘-ı bâtt-ı sahîh-i şer‘î ile bey‘ edüp kabz-ı semen-i ma‘dûd, mezbûru mahâllinde kabz, taslît eyledim. Ol dahi vech-i mübeyyen üzre iştirâ ve teslîm[tesellüm] eyledi. Ba‘de’l-yevm zikrolunan menzil ve bağlar mezbûr Hortik[‘in] mülk-i müşterâsıdır. Keyfe mâ yeşâ ve yahtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehu’l-mezbûr Hortik bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî-evâsıt-ı Rebî‘i’l-âhir li-sene selâse ve hamsîn ve elf. Şuhûdü’l-hâl: Bağdeser v. Mardik, Arslan v. Demirci, Agop v. Ferhad, Mardiros v. Agop