Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 77 Hüküm no: 73 Orijinal metin no: [31-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Angeli v. Yorgi’nin Hasköy’deki meyhane ve bakkal dükkânını kiraya vermesi Mahmiye-i Kostantıniyye ebvâbından Balat Kapısı hâricinde Karabaş mahallesinde sâkin Angeli [v.] Yorgi nâm zimmî meclis-i şer‘-i kavîmde Hasköy sâkinlerinden meyhâneci tâifesinden Atanaş v. Mihal ve Dimitridi v. Kosta ve Hristo v. Yani nâm zimmîler mahzarlarında takrîr-i kelâm ve ta‘bîr ani’l-merâm edüp karye-i mezbûrede beynimizde lede’l-ahâlî ve’l-cîrân ma‘lûmü’l-hudûd olan meyhânemi ve bir bâb bakkāl dükkânımı mezbûrûn Atanaş’a ve Dimitridi ve Hristo’ya alâ vechi’l-iştirâki’s-seviy beher sene yirmi altı bin akçeye îcâr, merkūmûn zimmîler dahi istîcâr edüp mezbûrûn zimmîlere teslîm eylemişdir. Sene tâmamına dek benim ve evlâdlarımın alâka ve medhalleri yokdur deyü merkūm Angeli bi’t-tav‘i’s-sâf ve’r-rızâ ikrâr ve i‘tirâf ettiğinde el-mukarru lehümü’l-mesfûrûn dahi bi’l-muvâcehe tasdîk ve bi’l-müşâfehe tahkīk edicek mâ hüve bi’t-taleb ketb olundu. Tahrîren fi’l-yevm hamse aşer fî-şehr-i Cumâdelûlâ li-sene selâse ve erba‘în ve elf. Şuhûdü’l-hâl: Mustafa Bey b. Mehmed, Sinan b. Abdullah, Yahya Çelebi b. İbrâhim, Mahmud Beşe b. Abdullah, Ali Beşe el-Muhzır ve gayruhum