Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 873 Hüküm no: 1142 Orijinal metin no: [138a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Osman Halîfe b. Receb’in, Ramazan Bey b. Hüseyin’deki alacağını vârislerin tahsil ettiği Mahmiye-i İstanbul’da Saray-ı cedîd-i sultânî’de büyük oda gılmânından iken bundan akdem vefât eden Osman Halîfe b. Receb’in verâseti vâlidesi Âişe [bt.] Mehmed’e ve li ebeveyn kız karındaşı Fâtıma nâm hâtuna münhasıra olduğu şer‘an zâhir ve müte‘ayyin oldukdan sonra merkūme Âişe kendi tarafından asîl ve merkūme Fâtıma tarafından husûs-ı âti’l-beyânı ikrâra vekîl olup zâtını ma‘rifet-i şer‘iyye ile ârifân olan Şaban Çavuş b. Mustafa ve İbrahim Bey b. Ömer şehâdetleriyle şer‘an vekâleti sâbite oldukdan sonra asâleten ve vekâleten meclis-i şer‘-i hatîr-i lâzımü’t-tevkīrde yine zikr olunan oda ahâlîsinden bâ‘isü’l-kitâb Beşiktaşlı Ahmed Ağa b. Abdullah tarafından ikrâr-ı âti’l-beyânı tasdîka sâbitü’l-vekâle vekîli olan saray-ı mezbûr teberdârlarından Ramazan Bey b. Hüseyin mahzarında ikrâr ve takrîr-i kelâm edip mûrisimiz müteveffâ-yı mezbûrun müvekkili mezbûr Ahmed Ağa zimmetinde cihet-i karz-ı şer‘îden on sekiz bin akçe hakkı olup altı bin akçesini müvekkil-i mezbûr Ahmed Ağa mûrisimiz müteveffâ-yı mezbûr Osman Halîfe’ye hayâtında def‘ ve teslîm edip meblağ-ı bâkī on iki bin akçe zimmetinde kalmışidi deyû bundan akdem müvekkil-i mezbûrdan da‘vâ ve taleb eylediğimizde, beynimizde münâza‘ât-ı kesîre ve muhâsamât-ı şedîde vakı‘a olmağın el-hâletü hâzihî vesâtat-ı muslihîn ile da‘vâ-yı mezbûremizden müvekkil-i mezbûr Ahmed Ağa beni seksen kıt‘a esedî guruş üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr seksen esedî guruşu müvekkil-i mezbûr Ahmed Ağa yedinden tamâmen ahz u kabz edip husûs-ı mezbûra müte‘allika da‘vâdan asâleten ve vekâleten müvekkil-i mezbûr Ahmed Ağa’nın zimmetini ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Kasım Halîfe b. ( ) Odabaşı, umdetü’l-emâcid Ali Ağa Kethüdâ, Mustafa Halîfe b. ( ) Odabaşı, Pars Kethüdâ [b.] Hüseyin, Pars Kethüdâ-yı Ramazan Bey.