Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 81 Hüküm no: 80 Orijinal metin no: [34-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehran Hatun’un Ahmed Çelebi mahallesindeki menzilini satması Bundan akdem Üsküdar sükkânesinden olan fahrü’l-muhadderât Şehran Hatun bt. Mehmed mahfil-i kazâda [işbu] râfi‘u’l-kitâb Ahmed Bey b. Mehmed Cündî mahzarında bi’t-tav‘i’s-sâf ikrâr ve i‘tirâf edüp karye-i mezbûre mahallâtından Ahmed Çelebi mahallesinde vâki‘ bir tarafı müşteri-i mezbûra ve bir tarafı Ahmed Çelebi mülküne ve bir tarafı Bayram b. Abdullah mülküne ve bir tarafı tarîk-ı hâssa muttasıl olan mülk menzilin içinde iki bâb tahtânî menzilini ve su kuyusuyla içinde eşcâr-ı müsmire ve gayr-ı müsmire[yi] müştemil olan mülk menzilimi mezbûr Ahmed Bey’e dokuz bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edüp semeni olan meblağ-ı mezbûru mezbûr Ahmed Bey yedinden bi’t-tamam ahz u kabz edüp min-ba‘d el-yevm menzil-i mahdûdu keyfe mâ yeşâ ve yahtâr mutasarrıf olsun dedikde mukırr-ı mezbûre[ni]n vech-i meşrûh üzre sâdıra olan kelâm-ı meşrûhasında mü[ş]terî-i mezbûr-ı mezkûr Ahmed Bey bi’l-muvâcehe tasdîk ve bi’l-müşâfehe tahkīk eyledikden sonra mezbûr-ı mahdûd, mezbûr Ahmed Bey’e mülkiyet üzre tasarrufuna hükmolunup mâ hüve’l-vâki‘ bi’t-taleb ketb olundu. Tahrîren fî-evvel-i Cemâziyelevvel li-sene selâse ve selâsîn ve elf. Şuhûdü’l-hâl: İbrâhim Bey b. Mustafa er-râcil, Osman Bey b. Mustafa es-sarrâc-ı Sultânî, Müstedam Bey b. Abdullah, Mustafa b. Mehmed es-sarrâc-ı Sultânî, Mehmed Çelebi el-müezzin