Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 82 Hüküm no: 81 Orijinal metin no: [34-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumyan Efendi’nin evine emanet bırakılan yedi fıçısını talebi Medîne-i Ebî Eyyûb el-Ensârî -aleyhi rahmeh- muzâfâtından Hasköy mahallâtından Yahûdiler mahallesinde Kemâl mahallesinde sâkin Kemâl v. İsak nâm Yahûdî mahfil-i kazâda işbu bâ‘isü’l-kitâb zimmî tâifesinden Rumyan Efendi v. Mordi nâm zimmî muvâcehesinde takrîr-i da‘vâ edüp bundan evvel mezbûr efendi menzilinde yedi aded fıçı mülküm vardır. Bi-hasebi’ş-şer‘i’ş-şerîf suâl olunup alıverilmesin taleb ederim dediğinde gıbbe’s-suâl zimmî, mezbûr efendi fi’l-vâki‘ mezkûr yedi aded fıçı silk-i mülk-i mülküne hâlis mâlikdir. Bir tarîk ile bende komuşlardır deyü cevâb vericek müdde‘î-i mezbûr Kemâl’den da‘vâsına muvâfık beyyine taleb olundukda udûl-i ricâlden Salamon v. Haron, Yasef v. Avrayim, İsak v. ( ) Yahûdîler meclis-i şer‘-i şerîfe hâzırân olup fi’l-vâki‘ zimmî-i mezbûr, zimmî efendi menzilinde olan yedi aded fıçısı Yahûdî mezbûr Kemâl’in mülk-i mahz ve hakk-ı sırfdır bu husûsa şâhidleriz şehâdet dahi ederiz deyü edâ’-i şehâdet-i şer‘iyye ettiklerinde ba‘de ri‘âyet-i şerâiti’l-kabûl mezbûrânın cihet-i meşrûha üzre şehâdetleri hayyiz-i kabûlde vâki‘ olup mâ hüve’l-vâki‘ bi’t-taleb ketb olundu. Tahrîren evvel-i Cemâziyelevvel li-sene selâse ve selâsîn ve elf. Şuhûdü’l-hâl: İbrâhim Bey b. Ali, Mustafa b. Hızır, Hasan b. Abdullah, Mustafa b. Hasan, Mahmud Çelebi el-müezzin, Mehmed Beşe b. Abdullah, Mehmed b. ( ) el-muhtesib.