Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 82 Hüküm no: 82 Orijinal metin no: [34-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keçeciler mahallesindeki menzilin satışı Medîne-i Ebî Eyyûb el-Ensârî -aleyhi rahmeti’l-Bârî- muzâfâtından Hasköy mahallâtından Keçeciler mahallesinde sâkin Ali b. ( ) nâm kimesne mahfil-i kazâda işbu râfi‘u’l-kitâb Ahmed b. Bunbaz nâm emred mahzarında bi’t-tav‘[i]’s-sâf ikrâr ve i‘tirâf edüp mahalle-i mezbûrda vâki‘ bir tarafı Hasan b. Abdülkerim mülkü ve bir tarafı Mustafa b. Ser-bölük mülkleri ve bir tarafı müşteri-i mezbûr mülküne ve bir tarafı tarîk-ı âmma muttasıl olan menzili fevkānî ve tahtânî iki bâb odayı arzan on bir zirâ‘ tûlen dört zirâ‘ kenîfe muttasıl eşcâr-ı müsmireye değin menzil-i mahdûd-ı mezbûr Ahmed’e dört bin beş yüz akçeye bey‘-ı bâtt-ı sahîh-i şer‘î ile bey‘ edüp semen olan meblağ-ı mezbûru mezbûr Ahmed yedinden bi’t-tamam ve’l-kemâl ahz u kabz eyledim. Min-ba‘d el-yevm menzil-i mezbûr-ı mahdûd, mezbûr Ahmed’in mülk-i müşterâsıdır. Keyfe mâ yeşâ ve yahtâr mutasarrıf olsun deyicek menzil-i mahdûdun kuyusu olage[l]diği vech, ber-vech-i iştirâk olmak üzre iç tarafında bâyi‘-i mezbûra kapı açıvermek üzre mutasarrıf ola. Mâ hüve’l-vâki‘ bi’t-taleb ketb olundu. Tahrîren fî-evvel-i Cemâziyelevvel sene selâse ve selâsîn ve elf. Şuhûdü’l-hâl: Yakub Bey b. Aydın, Mustafa el-imâm, Ömer Bey b. Mustafa, Hüseyin b. Abdülkerim, Hacı Mercan ve gayruhum