Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 874 Hüküm no: 1143 Orijinal metin no: [138a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan b. Abdullah’ın gece evine sarhoş olarak giren Mahmud Beşe b. Mahmud’un tazirine karar verildiği Mahmiye-i İstanbul’da İskender Ağa mahallesinde sâkin işbu bâ‘isü’l-kitâb Rıdvan b. Abdullah nâm kimesne mahfil-i kazâda Mahmud Beşe b. Mahmud nâm kimesne mahzarında üzerine da‘vâ ve takrîr-i kelâm edip târih-i kitâb gecesi vakt-i mağribde mezbûr Mahmud Beşe mahalle-i mezbûrda sâkin olduğum menzilin kapısın açıp benim iznim yoğiken menzilime girip mezbûru menzilim içinde sekrân buldum, husûs-ı mezbûr suâl olunup mûceb-i şer‘îsi icrâ olunmak matlûbumdur dedikde, gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda yine mahalle-i mezbûre sükkânından Mustafa b. Abdullah ve İbrahim b. Mehmed ve Hüseyin Beşe b. Ahmed nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-hakīka müdde‘î-i mezbûrun mahalle-i mezbûrda sâkin olduğu menzilinin dâhilinde vakt-i mezbûrda mezbûr Mahmud Beşe girip müdde‘î-i mezbûr feryâd eylediğinden dahi vardığımızda mezbûr Mahmud Beşe’yi menzil-i mezbûrun dâhilinde bulup ve gördük, bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri makbûle olmağın mûcebince mezbûr Mahmud Beşe’nin ta‘zîrine hükm olunup mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Ramazan Efendi b. Seyfullah, Mehmed b. Zülfikār, Yusuf Beşe b. Ahmed, es-Seyyid Mustafa Çelebi b. Mehmed, Ali Beşe b. Mehmed.