Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 86 Hüküm no: 89 Orijinal metin no: [36-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasköy’de Kaptan Sinan Paşa Evkafı’na ait peremeci odalarının tamir edilerek kiralanması için keşif yapılması Mahmiye-i Galata hâricinde kasaba-i Beşiktaş’da vâki‘ merhûm Kapudan Sinan Paşa Evkāfı’na bi’l-fi‘il mütevellî olan fahrü’l-cüyûş Mehmed Çavuş b. İbrâhim Efendi mahfil-i kazâya gelip takrîr-i kelâm ve bast-ı merâm edüp vakf-ı mezbûrdan olup Havâss-ı aliyye kazâsı muzâfâtından Hasköy’de vâki‘ peremeci odaları müddet-i medîde hâlî ve mu‘attal kalmağla harâb olup vakf-ı mezbûrdan ta‘mîr ve termîm olunmağa müsâ‘ade olmadığı ecilden kıbel-i şer‘-i şerîfden üzerine varılıp zikrolunan odaların noksanı keşf ve tahrîr olunup vakf-ı mezbûra her vechle enfa‘ ve evlâ olmağla mukāta‘a ile verilmek matlûbumdur dedikde kıbel-i şer‘-i şerîfden ve hâssa mi‘mârlardan Üstâd Hüsrev b. Abdullah ve zeyl-i kitâbda mastûrü’l-esâmî olan bî garaz Müslimânlar ile mahalle-i mezkûre varılup zikrolunan odaları müşâhede eylediklerinde mi‘mâr-ı mezbûr sâlifü’z-zikr odaların tahta ve merteği ve kiremidi ancak sekiz bin akçe eder deyü tahmîn-i sahîh ile tahmîn edüp haber verdikde mâ hüve’l-vâki‘ gıbbe’t-taleb ketb olundu. Tahrîren fî-evâil-i Cumâdelâhire li-sene erba‘a ve selâsîn ve elf. Şuhûdü’l-hâl: Abbas Efendi b. Davud, Mehmed Çelebi b. Mustafa, Mehmed Beşe b. Kadri, Üstâd Murad b. Abdullah, Veli Beşe b. Kulu, İsa Bey b. Mustafa Ser-bölük, Hüseyin b. İbrahim, el-Hâc Mustafa b. Abdullah ve gayruhum