Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 86 Hüküm no: 90 Orijinal metin no: [36-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasköy’de Kaptan Sinan Paşa Evkafı’ndan olup tamire muhtaç olan ekmek fırınına keşif yapılması Havâss-ı aliyye kazâsında vâki‘ Hasköy sâkinlerinden işbu râfi‘u’l-kitâb Mihail ve Arsinos veledey Yani nâm zimmîler mahfil-i kazâya gelip her biri takrîr-i kelâm edüp husûs-ı âti’l-beyânı mahâllinde keşf ve tahrîr olunması içün kıbel-i şer‘-i şerîfden âdem taleb etmeğin bi’z-zât hâkim-i muvakkı‘-ı kitâb-ı müstetâb ve zeyl-i kitâbda mastûrü’l-esâmî olan bî-garaz Müslimîn ile karye-i merkūmede vâki‘ merhûm ve mağfûrun-leh Kapudan Sinan Paşa Evkāfı’ndan olup vakf-ı mezbûra intimâ ile tahdîd ve tavsîfden müstağnî olan bir bâb ekmekci fırını harâb olup kābil-i intifâ‘ olmayıp ve vakf-ı mezbûrda dahi ta‘mîr ve termîmine müsâ‘ade olmamağla üstâd mi‘mârlardan Hüsrev Bey b. Abd ve Mehmed Bey b. Abdullah nâm kimesneler ile fırın-ı mezbûrun üzerine varılup müşâhede olundukda sakfı ve dolma duvarı ve anbâr döşemesi ve un yeri ve ahırı ve ocağı harâb olduğu mezbûrân zimmîlerin takrîrine muvâfık bulunup bennâ zirâ‘ıyla tûlen altmış zirâ‘ olup kiremidi ve bir dolabı ve [37] yüz elli akçe ve üç aded mükemmel kafesli masandralarına on beş bin akçe üç aded ocaklarına dört bin beş yüz akçe ve üç aded sâde masandrasına üç bin dokuz akçe ve bir sâde ocağına beş yüz akçe ve bir mükemmel matbah ocağına dört bin akçe ve üç aded çiftler? bin iki yüz akçe, dört aded kemer kapısına iki bin dört yüz akçe ve dört aded sâde kapısına beş yüz altmış akçe, taşrada vâki‘ kapısına bin akçe, yirmi iki aded taban direklerine dört bin dört yüz akçe ve on üç zirâ‘ havâle kafesine bin üç yüz akçe ve trabozanına bin yüz akçe, mükemmel kenîfine üç bin akçe, bir taş nerdübânına dört bin akçe ve bir haşeb nerdübânına yedi yüz akçe ve kilâr kapısına ve nerdübânına iki yüz elli akçe, bağçenin parmaklığı içün dirgelerine yedi yüz otuz akçe ve su hazînesine taşlarına ve pehl(…) altı bin akçe ve havuz ve şadırvan ve mükemmel kubbesine on yedi bin akçe ve hamam ve câmekân ve kulleteynine altmış bin akçe ve yüz otuz zirâ‘ dolma duvarına altı bin beş yüz akçe, beş demir penceresine iki bin akçe, otuz zirâ‘ duvarın temeline bin beş yüz akçe ve elli bir zirâ‘ sofa döşemesine, bin yedi yü[z] doksan akçe ve yüz doksan zirâ‘ tahta tavanına yedi bin üç yüz akçe, taşrada vâki‘ taş nerdübânına dört bin akçe ve iki yüz altmış zirâ‘ ( ) üç bin yüz yirmi akçe ve bir mahzeni kapısına üç yüz akçe, üç mahzeni tûlen bin altı yüz akçe ve üç aded çerçe[ve] camlarına yedi yüz akçe ki cem‘an dört yük yirmi dokuz bin dört yüz akçe ile ancak olur noksan ile binâ mümkin değildir deyü icmâ‘ ve ittifâk eylediklerinde vâki‘ hâl bi’t-taleb ketb olundu. Fî-evâil-i Cumâdelâhire li-sene selâse ve hamsîn ve elf. Şuhûdü’l-hâl: Umdetü’l-e‘âlî menba‘u’l-meâli Mustafa Ağa Mîr-i Alem, Kıdvetü’l-e‘âzım Mustafa Ağa Başçavuş-ı Sâbık, Yusuf Efendi el-kâtib, Ahmed Çelebi b. Muslu Hammâmî, Şaban Çelebi el-kâtib, Ömer Bey el-Bevvâb-ı Sultânî, Abdullah Bey el-Bevvâb-ı Sultânî ve gayruhum mine’l-huzzâr