Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 875 Hüküm no: 1144 Orijinal metin no: [138a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hüseyin’in, Ahmed Beşe b. Mustafa’da câriye bahasından alacağı kaldığı Mahmiye-i İstanbul’da Haraççı Muhyiddin mahallesinde sâkine Fâtıma bt. Hüseyin nâm hâtun meclis-i şer‘-i şerîf-i lâzımü’t-teşrîfde Ahmed Beşe b. Mustafa nâm kimesne mahzarında üzerine da‘vâ ve takrîr-i kelâm edip mezbûr Ahmed Beşe zimmetinde yedimden müşterâ ve makbûz evsâfı beynimizde ilm-i şer‘î ile [138b] ma‘lûm Rûsiyyetü’l-asl Gülbûy bt. Abd[ullah] nâm câriye semeninden yüz on esedî guruş hakkım olup meblağ-ı mezbûrdan on esedî guruşunu mezbûr Ahmed yedinden ahz u kabz edip meblağ-ı bâkī yüz esedî guruşu dahi mezbûr Ahmed Beşe’den taleb ederim suâl olunup alıverilmesi matlûbumdur dedikde gıbbe’s-suâl mezbûr Ahmed Beşe cevâbında fi’l-hakīka müdde‘iyye-i mezbûre Fâtıma’ya cihet-i mezbûreden üzerine edâsı lâzım yüz esedî guruş deyni olduğu bi tav‘ihî ikrâr ve i‘tirâf etmeğin mûcebince meblağ-ı mezbûr yüz esedî guruşu müdde‘iyye-i mezbûre Fâtıma’ya edâ ve teslîme mezbûr Ahmed Beşe’ye tenbîh birle mâ vaka‘a bi’t-taleb ketb olundu. Fi’l-yevmi’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed b. Abdullah, Hasan b. Ahmed, Mustafa Çelebi b. Hacı Ahmed, İbrahim b. Mehmed, Veli b. Mahmud.