Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 90 Hüküm no: 96 Orijinal metin no: [39-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi’nin Keçeciler mahallesindeki evini satması Havâss-ı aliyye kazâsına tâbi‘ Hasköy mahallâtından Keçeciler mahallesinde sâkin Hasan Çelebi b. Mustafa nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Fâtıma bt. Yahya nâm hatun mahzarında bi’t-tav‘i’s-sâf ikrâr ve takrîr-i kelâm edüp silk-i mülkümde münselik olup mahalle-i mezbûrede vâki‘ bir tarafdan Şaban b. Mustafa mülkü ve bir tarafdan Ahmed b. Abdi mülkü ve bir tarafdan Pir Veli b. Mustafa mülkü ve bir tarafdan Mustafa Usta b. Ali mülkü ile mahdûd ve mümtâz olan iki bâb tahtânî ve bir bâb fevkānî odayı ve bir bi’r-i mâyı ve kenîfi ve hadîka[yı] müştemil olan mülk menzilimi mezbûre Fâtıma Hatun’a nakd-i râyic fi’l-vakt dokuz bin beş yüz akçeye bey‘-ı bâtt-ı sahîh-i şer‘île bey‘ edüp kabz-ı semen-i ma‘dûd ve teslîm-i mebî‘-i mahdûd eyledim. Ba‘de’l-yevm menzil-i merkūm cümle tevâbi‘i ve levâhıkı ile merkūme Fâtıma Hatun’un mülk-i müşterâsıdır. Keyfe mâ yeşâ ve yahtâr mutasarrıfe olsun dedikde mukırr-ı merkūmun ikrâr-ı meşrûhunu el-mukarru lehe’l-mezbûre Fâtıma Hatun bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî-gurre-i şehr-i Recebi’l-mürecceb li-sene selâse ve hamsîn ve elf. Şuhûdü’l-hâl: Mustafa Halîfe b. Surûrî el-imâm, Mehmed Halîfe b. İbrâhim el-müezzin, Kubad b. Mustafa, Ömer Beşe b. er-râcil, Ahmed b. Abdi, Mustafa b. Yakup, Pir Veli [b.] Mustafa