Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 90 Hüküm no: 97 Orijinal metin no: [39-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahuda ve validesinin Ahmed Çelebi mahallesindeki evlerini satmaları Mahmiye-i İstanbul’da vâki‘ Küçük Selanik cemâ‘atinden Yahûda v. Avraham ve vâlidesi Mosatire bt. Salamon nâm Yahûdîler meclis-i şer‘-i hatîr-i lâzımü’t-tevkīrde işbu râfi‘u hâze’s-sifr Haydar v. Yako nâm Yahûdî mahzarında bi’t-tav‘i’s-sâf ikrâr ve takrîr-i kelâm eyleyip Havâss-ı aliyye kazâsına tâbi‘ Hasköy mahallâtından Ahmed Çelebi mahallesi kurbünde vâki‘ silk-i mülkümüzde münselik olup üç tarafdan merkūm Haydar mülkü ve bir tarafdan tarîk-ı âm ile mahdûd ve mümtâz olan bir bâb fevkānî odayı ve bir sofayı ve bir bâb tahtânî mahzeni ve bir kenîfi ve bir nısf bi’r-i mâyı ve hadîkayı müştemil «olan mülk menzilimizi merkūm Haydar’a» olup ale’l-iştirâki’s-seviy mutasarrıf olduğumuz mülk menzilimizi merkūm Haydar’a tâmmü’l-vezn sahîhü’l-ayâr iki yüz elli beş kıt‘a riyâlî kebîr guruşa bey‘-ı bâtt-ı sahîh-i şer‘ ile bey‘ edüp kabz-ı semen-i ma‘dûd ve teslîm-i mebî‘-i mahdûd eyledim, ol dahi vech-i mübeyyen üzre iştirâ ve tesellüm ve temellük eyledi. Ba‘de’l-yevm zikrolunan menzil, cümle tevâbi‘ ve levâhıkı ile merkūm Haydar’ın mülk-i müşterâsıdır dediklerinde mukırrân-ı merkūmânın ikrâ[r-ı] meşrûhlarını el-mukarru lehu’l-mezbûr Haydar bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min-Recebi’l-mürecceb li-sene selâse ve hamsin ve elf. Şuhûdü’l-hâl: Mahmud Çelebi b. Mehmed es-sarrâc, Ali Bey b. Mustafa Ser-bölük, Kubad b. Mustafa, Cafer b. Abdullah, Nefes Dede b. Hasan, Abdi Bey b. Şaban, İsak v. Fakan, Yasef v. Yako, Baruh v. Menahim