Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 875 Hüküm no: 1145 Orijinal metin no: [138b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil b. Mustafa’dan intikal eden terekenin, vârisliklerini ispat eden kız kardeşleri ve amca oğluna beytülmâl emîninden alınıp verilmesi Bi’l-fi‘l vilâyet-i Rumeli’nde Alakilise kasabasında nâibü’ş-şer‘i’ş-şerîf olan Yusuf Efendi b. Mustafa kıbelinden hat ve hatmini hâvî bin yetmiş yedi senesi Şevvâli’nin dördüncü günü târihiyle müverrah Zülfikār b. Kubeys nâm kimesne yediyle nakl-i şer‘î vârid olup mazmûnu Alakilise kazâsına tâbi‘ İlyaslar nâm karye sâkinlerinden Fâtıma ve Yusufe ve Hanife nâm hâtunlardan ve Ali b. Hızır nâm şâbb-ı emredden âti’l-beyânı vechi üzre da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra yine kazâ-i mezbûra tâbi‘ Sobucak nâm karyeden Mustafa b. Halil b. Abdullah ve İlyaslar’dan Hüseyin b. Sefer b. Yağmur nâm kimesneler li ecli’n-nakl ve’t-tahvîl mahall-i cerh ve ta‘dîle hâzırân olup bundan akdem Mahmiye-i İstanbul’da vefât edip muhallefâtı elân mahmiye-i mezbûrda emîn-i beytülmâli’l-âm yedinde mazbûta olan Halil b. Mustafa nâm müteveffânın müsteşhidât-ı mezbûrât Fâtıma ve Yusufe ve Hanife li ebeveyn kız karındaşları olup babaları ismi Mustafa ve vâlideleri ismi ( ) nâm hâtundur ve müsteşhid-i mezbûr Ali karındaşı oğlu olup babası ismi Hızır b. Mustafa’dır ve maskat-ı re’sleri karye-i mezbûre İlyaslar’dır, müsteşhidât-ı mezbûrât Fâtıma ve Yusufe ve Hanife ile müsteşhid-i merkūm Ali’den gayrı vâris-i uhrâ olduğu ma‘lûmumuz değildir, muhallefât-ı müteveffâ-yı mezkûreyi emîn-i müşârün-ileyhden ve sâir vaz‘-ı yed edenlerden mezbûrûn için hakk-ı taleb ve ahz vardır biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra müsteşhidât-ı merkūmât Fâtıma ve Yusufe ve Hanife ve müsteşhid-i mezbûr Ali mûrisleri müteveffâ-yı mezbûrun muhâllefâtını vaz‘-ı yed olanlardan da‘vâ ve taleb ve ahz u kabza ve kendilere îsâle ve kabz ve îsâl mütevakkıf olduğu umûrun küllîsine işbu nâkilü’l-kitâb Zülfikār b. Kubeys nâm kimesneyi taraflarından vekîl ve menâblarına nâib nasb ve ta‘yîn edip ol dahi vekâlet-i mezbûreyi kabûl ve hizmet-i lâzımesini edâya ta‘ahhüd ettiğini hâvî bulunmağın kitâb-ı mezbûr vekîl-i mezbûr Zülfikār talebiyle müteveffâ-yı mezbûrun zevce-i metrûkesi Âişe nâm hâtundan gayrı terekesine âhar müstahık olmamak zu‘mu ile mahmiye-i İstanbul’da beytülmâli’l-âmme emîni olan umdetü’l-emâsil ve’l-a‘yân Mahmud Ağa tarafından husûs-ı âti’l-beyâna vekîl-i sâbitü’l-vekâlesi olup müteveffâ-yı mezbûrun terekesine selâse erbâ‘ına vâzı‘ü’l-yed olan Ebûbekir Ağa b. Abdurrahman mahzarında feth ve kırâat ve istintâk olundukda mezbûr Ebûbekir Ağa müteveffâ-yı mezbûrun terekesinin selâse erbâ‘ına vâzı‘ü’l-yed olduğunu ikrâr, lâkin kitâb-ı mezbûrun mevlânâ-yı mezbûr kıbelinden vürûdunu inkâr etmeğin mezbûr Zülfikār’dan kitâb-ı mezbûr mevlânâ-yı mezbûr kıbelinden vürûduna beyyine taleb olundukda zeyl-i kitâbda isimleri mastûr olan şuhûd tarafından Mehmed b. Mustafa ve Şaban b. Sefer nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka kitâb-ı mezbûr mevlânâ-yı mezbûr kıbelinden vârid olup zeylinde olan hat ve hatm dahi hat ve hatmi olup bizim yanımızda imzâ ve hatm olup hat ve hatmine bizi işhâd eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Bey b. Abdullah, İbrahim b. Ahmed, Mehmed b. Ramazan, Veli b. Mahmud, Resul b. Rıdvan, Abdi b. Hüseyin, Şükrullah b. Mustafa, İvaz Efendi b. Şaban, Musa Efendi b. Ebûbekir, Baba Hızır b. Abdünnebi, Yakub Çelebi b. Nasuh, Ahmed Efendi b. Mehmed ve gayruhüm.