Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 877 Hüküm no: 1146 Orijinal metin no: [138b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hanım’ın para vakfından ödünç alıp karşılığında bahçesini rehin verdiği Husûs-ı âti’l-beyânın mahallinde tahrîri iltimâs olunmağın kıbel-i şer‘-i enverden irsâl olunan mevlânâ Mehmed Efendi b. Abdülbâkī, fahrü’l-müderrisîni’l-kirâm Şeyhzâde Mehmed Sâlih Efendi’nin mahmiye-i İstanbul’da Nişancı Paşa mahallesinde sâkin olduğu menzile varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i hatîr eyledikde vezîriâzam-ı sâbık merhûm Kara Mustafa Paşa’nın kerîmeleri olan umdetü’l-muhadderât Fâtıma Hanım’ın zâtı hocaları Mehmed Efendi b. Mustafa ve câbî Sefer Bey b. Ahmed ta‘rîfleri ile mu‘arrefe oldukdan sonra meclis-i ma‘kūd-ı mezkûrda kendi vakfı olan nukūda mütevelliye olan bâ‘isetü hâze’l-kitâb Âişe Hâtun bt. Sefer Efendi mahzarında ikrâr ve takrîr-i kelâm edip mâl-ı vakf-ı mezkûrdan mütevelliye-i mezkûre Âişe Hâtun yedinden iktirâz ve kabz eylediğim iki bin iki yüz esedî guruş ve hediyesi târih-i kitâbdan [127a] üç yüz altmış gün tamâmına değin müeccel mev‘ûd ve mütevelliye-i mezkûre yedinden müşterâ ve makbûz bir Mushaf-ı şerîf hediyesinden dahi üç yüz otuz esedî guruş ki cem‘an iki bin beş yüz otuz esedî guruş vakf-ı mezbûra zimmetimde lâzımü’l-edâ ve vâcibü’l-kazâ deynim olup mukābelesinde mahmiye-i mezkûre hısnı ebvâbından Topkapısı hâricinde vâki‘ bir tarafdan Süleyman Paşa Çayırı ve bir tarafdan Mirza Çavuş mülkü ve bir tarafdan harâbe ahır ve bir tarafdan tarîk-i âm ile mahdûd dâhilen ve hâricen büyût-ı adîde ve kanavât ile müsennât-ı mâ-i cârî ve zât-ı eşcâr-ı müsmire ve gayr-ı müsmireyi müştemil mülk bahçemi cümle hukūk ve merâfıkı ile fâriğan ani’ş-şevâgil mütevellî-i mezkûreye rehin vaz‘ ve teslîm edip ol dahi irtihân ve tesellüm ve kabûl eyledi dedikde gıbbe’t-tasdîk medîne-i Üsküdar’da Hâcce Sultân mahallesinden olup zâtları Mehmed Efendi b. Mustafa ve Sefer Bey b. Ahmed ta‘rîfleri ile mu‘arrefeler olan Fâtıma Hâtun bt. Mustafa ile sadriye kızı Ümmühâni Hâtun bt. Mehmed ve Kayseriyeli Pervâne Ali Paşa kızı Fâtıma Hanım’ın kezâlik zâtını mu‘arrifân olan mezkûrân ta‘rîfleri ile mu‘arrefe oldukdan sonra her biri meclis-i ma‘kūd-ı mezbûrda meblağ-ı mezbûr iki bin beş yüz otuz esedî guruşa emr [ve] kabûlü hâviye kefâlet-i sahîha ile kefîl olmağın vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mehmed b. Ramazan ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Fahrü’l-müderrisîn Mehmed Efendi [b.] Mehmed, umdetü’l-kuzâti’l-İslâm İbrahim Efendi b. Hüsameddin, umdetü’l-müderrisîn Mehmed Sâlih Efendi [b.] İbrahim Efendi, Mehmed Efendi b. Yusuf el-İmâm, Mehmed Efendi b. Mehmed.