Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 120 Hüküm no: 169 Orijinal metin no: [69-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mihriban Hatun’un mirası hususundaki davanın sulhle sonuçlandığı Havâss-ı aliyye kazâsı muzâfâtından karye-i Has’da (…) ‘l-vakt olup ve emânet-i beytü’l-mâl zâbiti olan Halil Çelebi b. İbrâhim mahfil-i kazâda bâ‘isü’l-kitâb Ali b. Abdullah mahzarında bi’t-tav‘i’s-sâf ikrâr ve i‘tirâf edüp karye-i merkūme mahallâtından Turşucuzâde Hüseyin Çelebi mahallesinde sâkine iken fevt olan Mihriban bt. Abdullah nâm hatunun evlâd[ı] olmayıp verâseti hâlen zevci mezbûr Ali’ye ve beytü’l-mâle münhasıra oldukda muhallefâtının nısfı bi-hasebi’ş-şer‘ merkūm Ali’ye ve nısf-ı âharı emânet-i mahkiyem hasebiyle bana âid ve râci‘ olmak ile beynimizde münâza‘ât-ı kesîre vâkı‘a olup es-sulhü seyyidü’l-ahkâm muktezâsınca aramıza muslihûn tavassut edüp tehâruc-ı şer‘î tarîkiyle beni dört yüz nakd fıddî akçeye sulh eylediklerinde ben dahi sulh-i mezbûru kabûl, bedel-i sulh olan meblağ-ı merkūmu merkūm Ali yedinden bi’t-tamam ve’l-kemâl ahz u kabz edüp zimmetini ibrâ-ı âmla ibrâ ve ıskāt-ı hak eyledim. Ba‘de’l-yevm bi’l-asâle ve bi’l-vekâle müteveffât-ı mezbûrenin eğer bakar ve sâir esâs-ı beyt ve ism-i mâl ıtlâk olunan eşyâdan da‘vâ ve taleb edersem lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûr Halil Çelebi’nin vech-i meşrûh üzre sudûr ve zuhûr eden ikrâr ve i‘tirâfın el-mukarru lehu’l-merkūm Ali bi’l-muvâcehe tasdîk ve bi’l-müşâfehe tahkīk edicek mâ-vaka‘a gıbbe’t-taleb ketb olundu. Tahrîren fî-evâsıt-ı Rebî‘i’l-âhir li-sene ihdâ ve selâsîn ve elf. Şuhûdü’l-hâl: İbrâhim Efendi b. el-merhûm Bâlî Efendi el-imâm, Mehmed b. Haydar el-müezzin, Hüsrev b. Abdullah el-mütevellî, Mustafa b. Abdullah, Mehmed Çelebi b. Muslihiddin