Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 126 Hüküm no: 184 Orijinal metin no: [76-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasköy’deki meyhanecilerin sadrazam reayasından olup dışarından herhangi bir görevlinin vergi talep edemeyeceğine dair temessükleri olduğu «Mahmiye-i İstanbul’da masdariye resmi cem‘ine me’mûr olan Karakaş v. Yano nâm Yahûdî kasaba-i Hasköy’de Meyhâneci tâifesi» [77] Mahmiye-i İstanbul’da masdariye resmi cem‘ine me’mûr olan Karakaş v. Mayer nâm Yahûdî kasaba-i Hasköy’de meyhâneci tâifesinden Çano v. Dolet ve Reten v. Bayok ve İsrail v. Manes ve Nikola v. Cefer nâm zimmîleri meclis-i şer‘-i şerîf-i lâzımü’t-tevkīrde cümlesini ihzâr ve muvâcehelerinde üzerine takrîr-i da‘vâ edüp mezbûrların zimmetlerine lâzım gelen bahâsına biner akçe masdariyeyi merkūmûn zimmîlerden taleb eyledim. Suâl olunsun dedikde gıbbe’s-suâl merkūmûn zimmîler cevâblarında biz sadrazam olanların re‘âyâsından olmağla kadîmü’l-eyyâmdan masdariye nâmına bizden bir şey alınagelmemişdir deyü mümzâ ve mahtûm Gümrük Emîni Ahmed Ağa’nın temessükünü ibrâz ve feth ve kırâet olundukda mazmûnunda zimmetlerine lâzım gelen …? edâ edüp âhardan subaşı ve asesbaşı ve voyvoda, cizyedâr ve kassâbiye ve resm-i ibrişim ve ispençe ve mangır ve fıçı akçesi ve masdariye ve kul ve câriye? ve sâir şâkkadan rencîde ve remîde olunmaya deyü mastûr ve mukayyed bulunup ve merkūm Karakaş istintâk olundukda bu âna gelince merkūmûn meyhânecilerden masdariye nâmıyla [bi]r şey ahz u kabz olunmadı deyü bi-tav‘ihiikrâr ve i‘tirâf etmeğin mûcebiyle merkūm Karakaş Yahûdî bî-vech ta‘arruzdan men‘ olunup mâ hüve’l-vâki‘ gıbbe’t-taleb ketb olundu. Fi’l-yevmi’s-sâdis aşer min-Şevvali’l-mükerrem min-şuhûr-i sene iseneteyn ve seb‘în ve elf. Şuhûdü’l-hâl: Mehmed Bey b. Abdülmennan, Ali Bey b. Hızır, Dilaver Bey b. Abdullah, Mehmed Çelebi b. Ömer, Mahmud Çelebi b. Mehmed, İbrâhim Beşe b. Dilaver, Mehmed b. Abdullah, Hüseyin b. Mahmud ve gayruhum mine’l-hâzırîn Beyaz.