Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 127 Hüküm no: 185 Orijinal metin no: [78-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salamon v. Yahuda’nın Murdahay, Andovile ve İlya’da alacağı olduğunu ıspatlayamadığı Kasaba-i Hasköy’de sâkin Salamon v. Yahûda nâm Yahûdî meclis-i şer‘-i şerîfde işbu bâ‘isûne’s-sifr Murdahay v. Salamon ve Andovile v. Avraham ve İlya v. Kalef nâm Yahûdiler muvâcehelerinde üzerlerine takrîr-i da‘vâ edip merkūmûn Yahûdiler zimmetlerinde bir mikdâr hakkım olup vermekde ta‘allül eylediklerinde bin üç yüz altmış akçeye sulh olup bedel-i sulh olan meblağ-ı mezbûrun altı yüz akçesini ahz ü kabz edip mâ‘adâ olan yedi yüz altmış akçeyi hâlen taleb ederim suâl olunsun dedikde, gıbbe’s-suâl merkūmûn Yahûdiler cevâblarında müdde‘î-i merkūma bir akçe deynimiz olmayıp şirret edip bi-gayr-ı hakkın altı yüz akçemizi almışdır deyü inkâr eylediklerinde merkūm Salamon’dan sıdk-ı kelâmını mübeyyine beyyine taleb olundukda ikāmet-i beyyineden ızhâr-ı acz eyleyip istihlâf eyledikde fi’l-hakīka bedel-i sulh-i mezbûrdan müdde‘î-i merkūma bin üç yüz altmış akçe deyni olmadığına merkūmûn Murdahay ve Andovile ve İlya’ya yemîn teklîf olundukda onlar dahi her biri alâ-hasebi’l-mesûl yemîn billâhi’llezî enzele’t-Tevrâte alâ Musa aleyhi’s-selâm etmeğin mâ-hüve’l-vâki‘ bi’l-ibtigā ketb olundu. Fî-evâsıtı Şevvali’l-mükerrem sene isneteyn ve seb‘în ve elf. Şuhûdü’l-hâl: Mehmed Çavuş b. Abdullah, Mahmud Çelebi b. Mehmed, Mehmed Beşe b. Abdullah, Dilaver b. Abdullah, Hüseyin Çelebi b. Muharrem, Mehmed Çelebi b. Ömer, Mehmed b. Abdullah el-muhzır ve gayruhum mine’l-hâzırîn