Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 128 Hüküm no: 186 Orijinal metin no: [79-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksan v. Bedros’a ait olan evde Mehmed Bey’in herhangi bir hakkı olmadığı Fi’l-asl vilâyet-i Anadolu’da Eğin kasabası sükkânından olup hâlen Havâss-ı aliyye kazâsına tâbi‘ Hasköy kasabasında temekkün eden işbu bâ‘isü’s-sifr Aleksan v. Bedros nâm Ermeni meclis-i şer‘-i hatîr-i lâzımü’t-tevkīrde yine Eğin kasabasında sâkin Mehmed Bey b. Ahmed mahzarında üzerine takrîr-i da‘vâ edip Eğin kasabasında vâki‘ bir cânibi Tarhan nâm Ermeni mülkü ve bir cânibi Tarıh v. Mezferharad mülkü ve bir cânibi benim mülküm ve bir cânibi tarîk-i âm ile mahdûd olan menzil mukaddemâ büyük babam Bali nâm Ermeni mülkü olduğu hâlde babam olup bundan akdem hâlik olan Bedros Ermeni’ye hâl-i hayatında hîbe ve teslîm ol dahi ittihâb edip tasarruf üzere iken mürd oldukda menzil-i mezbûr bi-hasebi’l-irsi’ş-şer‘î bana intikāl etmiş iken mezbûr Mehmed Bey bi-gayr-ı vech-i şer‘î hazır bi’l-meclis Yanos nâm Ermeniye semen-i ma‘lûma bey‘ murâd eder suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr Mehmed Bey cevâbında fi’l-hakīka menzil-i mezbûru Bali nâm Ermeninin mülkü olmağla oğlu müdde‘î-i merkūm Aleksan’ın babası mersûm Bedros’a hîbe ve teslîm etmişdi. Lâkin mezbûr Bedros mürd olmağla merkūm Bali hîbesinden rücû‘ edip semen-i ma‘lûma bana bey‘ ve teslîm etmişdi. Binâen-aleyh mülk-i müşterâm olmağla vaz‘-ı yed ederim deyü ikrâr etmeğin ikrâr mûcebince menzil-i mesfûr mezbûr Aleksan Ermeni’ye hükmolunup mâ-hüve’l-vâki‘ gıbbe’t-taleb ketb olundu. Fi’l-yevmi’s-sâmin aşer min-Şevvali’l-mükerrem sene isneteyn ve seb‘în ve elf. Şuhûdü’l-hâl: Ebûbekir b. Ömer, İbrahim b. Bâyezid, Mustafa b. Ömer, Dilaver b. Abdullah, Mehmed b. Abdullah, Mahmud b. Abdullah, Hüseyin b. Abdullah ve gayruhum mine’l-hâzırîn