Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 128 Hüküm no: 187 Orijinal metin no: [80-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarabula bt. Yasef’in bir kadife kaftan ile kürkünü kızı Fâtıma Hatun’a hibe ettiği Havâss-ı Kostantıniyye kazâsına tâbi‘ kasaba-i Hasköy’de Kiremitçi Ahmed Çelebi mahallesi sâkinelerinden Sarabula bt. Yasef nâm Yahûdiye meclis-i şer‘-i hatîr-i lâzımü’t-tevkīrde sadriye-i kebîre kızı işbu hâmilü’l-vesîka Fâtıma Hatun bt. Abdullah nâm hatunun zevci ve tarafından tasdîk-i câi’z-zikre vekîli olup bimâ-hüve tarîkı’s-sübût şer‘an vekâleti sâbite olan Ali Çelebi b. Abdülmennan muvâcehesinde bi-tav‘ihâ ikrâr ve i‘tirâf edip silk-i mülk-i sahîhimde münselike anberî kadife bir kaftan ile bir müsta‘mel kürkümü kızım müvekkile-i mezbûre Fâtıma Hatun’a bundan akdem hîbe-i sahîha-i şer‘iye ile hîbe ve teslîm ol dahi meclis-i hîbede vech-i muharrer üzere ittihâb ve tesellüm ve kabûl ü kabz eyledi. Ba‘de’l-yevm sâlifü’z-zikr kaftan ve kürk kızım müvekkile-i mezbûrenin mülk-i mevhûbu olmuşdur. Keyfe mâ yeşâ’ ve yehtâr mutasarrıfa olsun dedikde gıbbe’t-tasdîkı’ş-şer‘î mâ-hüve’l-vâki‘ bi’l-ibtigā ketb olundu. Fi’l-yevmi’s-sâmin aşer min-Şevvali’l-mükerrem min-şuhûri sene isneteyn ve seb‘în ve elf. Şuhûdü’l-hâl: Dilaver Bey b. Abdullah, İbrahim Bey b. Dilaver, Mehmed b. Abdullah ve gayruhum mine’l-hâzırîn