Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 129 Hüküm no: 188 Orijinal metin no: [80-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avraham v. Vakal’ın Gürcü asıllı cariyesini azat ettiği Havâss-ı Kostantıniyye kazâsına tâbi‘ kasaba-i Hasköy’de sâkin Avraham v. Vakal nâm Yahûdî tarafından ikrâr-ı câi’z-zikre vekîl olup bimâ-hüve nehcu’s-sübût şer‘an vekâleti sâbite olan oğlu Sahak nâm Yahûdî meclis-i şer‘-i lâzımü’t-tevkīrde müvekkil-i merkūm Avraham’ın mülk-i müşterâsı olup rıkk-ı sâbıkına mu‘terife işbu orta boylu, açık kaşlı, gök gözlü Gürciyyetü’l-asl Dâye Murnic bt. Toskaya nâm Nasrâniyeyi lâ li-garazin ‘âcil ve lâ li-ivazin âcil malımdan âzad ve zümre-i harâir-i asliyâta ilhâk ve idrâc eyledim. Ba‘de’l-yevm câriye-i mevsûfe-i mezbûre sâir harâir-i asliyât gibi hürre olup üzerinde hakk-ı velâdan gayrı hakkım kalmadı dedi dedikde, gıbbe’t-tasdîkı’ş-şer‘î mâ-hüve’l-vâki‘ bi’l-ibtigā ketb olundu. Fi’l-yevmi’l-hâdî ve’l-işrîn min-Şevvali’l-mükerrem min-şuhûri sene isneteyn ve seb‘în ve elf. Şuhûdü’l-hâl: Ali Bey b. Hızır, Dilaver Bey b. Abdullah, Mahmud Çelebi b. Mehmed, Mehmed Beşe el-muhzır ve gayruhum mine’l-hâzırîn