Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 130 Hüküm no: 190 Orijinal metin no: [81-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Harasbula bt. Yasef’in Dimeşk’deki zevcinin kendisine kutu içinde değerli taşlar gönderdiği iddiası Havâss-ı Kostantıniyye kazâsına tâbi‘ kasaba-i Hasköy’de Kiremitçi Ahmed Çelebi mahallesi sâkinlerinden Harasbula bt. Yasef nâm Yahûdiye meclis-i şer‘-i hatîr-i lâzımü’t-tevkīrde işbu bâ‘isü’s-sifr Murdahay v. Yosef nâm Yahûdî muvâcehesinde üzerine da‘vâ ve takrîr-i kelâm edip zevcim olup diyâr-ı Dimeşk’de mütemekkin olan merkūm Murdahay’ın li-ebeveyn er karındaşı Ebisay nâm Yahûdî bir kutu içinde adedi ve mikdârı beynimizde ma‘lûm ağdâyı? ve yemenî taşları bana irsâl etmiş iken merkūm Murdahay tesellüm etmeyip ta‘allül eder, suâl olunsun dedikde gıbbe’s-suâl mezbûr Murdahay cevâbında ol taşları merkūme Harasbula gāib-i mezbûr irsâl eylediği ma‘lûmum değildir deyücek müdde‘iye-i mezbûreden sıdk-ı kelâmını mübeyyine beyyine taleb olundukda ikāmet-i beyyineden ızhâr-ı acz edip istihlâf etmeğin fi’l-hakīka ol kutu içinde mevcûd mastûr olan taşları karındaşı gāib-i mezbûr zevcim merkūmeye teslîm eyle deyü irsâl etmediğine yemîn teklîf olundukda merkūm Murdahay dahi yemîn billâhi’llezî enzele’t-Tevrâte alâ Musa aleyhi’s-selâm etmeğin mâ vaka‘a gıbbe’t-taleb ketb olundu. Fî-gurreti Zilka‘deti’ş-şerîfe sene isneteyn ve seb‘în ve elf. Şuhûdü’l-hâl: Mustafa Efendi b. ( ) el-hâkî, Mehmed Bey b. Ahmed, Mehmed Çavuş b. İsa, Hüseyin b. Mahmud