Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 130 Hüküm no: 191 Orijinal metin no: [82-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bünyamin v. Hanoka’nın Postire bt. Avraham’ı üç talak ile boşadığı Havâss-ı Kostantıniyye kazâsına tâbi‘ kasaba-i Hasköy’de Kiremitçi Ahmed Çelebi sâkinelerinden bâ‘isü’l-vesîka Postire bt. Avraham nâm Yahûdiyye meclis-i şer‘-i hatîr-i lâzımü’t-tevkīrde Bünyamin v. Hanoka nâm Yahûdî mahzarında takrîr-i da‘vâ edip merkūm Bünyamin bundan akdem zevcim olup bir husûsda bana gazab edip benden üç talâk boş ol deyü beni talâk-ı selâse ile tatlîk murâd etmiş iken hâlen merkūm Bünyamin yine kemâ-kân benimle mu‘âmele-i zevciyet eder, suâl olunup men‘ ü def‘ olunmak matlûbumdur dedikde, gıbbe’s-suâl mersûm Bünyamin cevâbında, müdde‘iye-i mezbûreyi târih-i kitâbdan üç sene mukaddem yüz kıt‘a riyâlî guruş mehr-i müeccel ile tezevvüc edip tasarrufumda idi. Lâkin iki ay mukaddem cemî‘ esbâb ve eşyâsını alıp babası hazır bi’l-meclis olan mersûm Avraham Yahûdî’nin evine gidip hâliyâ onda sâkinedir deyü on bin akçe mehr-i müeccel [ile] mezbûreyi tezevvüc ve kabûl eylediğini ikrâr lâkin vech-i muharrer üzere tatlîk eylediğini münkir olucak müdde‘iye-i mezbûreden da‘vâsına mutâbık beyyine taleb olundukda yine Yahûdî tâifesinden olup hemcivârı olan Mosi v. Yahûda ve Kalef v. Baruh nâm Yahûdiler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka Bünyamin bundan akdem zevce[si] mezbûre Postire ile münâkaşa eylediklerinde benden üç talâk boş ol deyü bizim huzûrumuzda merkūm Bünyamin zevce[si] mezbûre Postire’yi üç talâk boşadı, biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-hüve’l-vâki‘ bi’l-ibtigā ketb olundu. Fi’l-yevmi’l-hâmis ve’l-işrîn min-Şevvali’l-mükerrem sene isneteyn ve seb‘în ve elf. Şuhûdü’l-hâl: Mehmed Efendi b. Mustafa el-imâm, Abdülbaki Çelebi b. Ahmed el-müezzin, Mehmed Çavuş b. Abdullah, Dilaver Bey b. Abdullah, Mahmud Çelebi b. Mehmed, Mehmed b. Abdullah el-muhzır, İbrahim el-muhzır ve gayruhum mine’l-hâzırîn