Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 131 Hüküm no: 192 Orijinal metin no: [83-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bünyamin v. Hanoka’nın boşadığı hanımı Postire bt. Avraham’ın mehrini ödemesine hükmolunduğu Havâss-ı Kostantıniyye -hamâhallâhu te‘âlâ ani’l-beliyye- kazâsına tâbi‘ kasaba-i Hasköy’de Kiremitçi Ahmed Çelebi mahallesi sâkinlerinden işbu hâmilü’l-vesîka Postire bt. Avraham nâm Yahûdiyye meclis-i şer‘-i şerîfde zevc-i mutallıkı Bünyamin v. Hanoka nâm Yahûdî muvâcehesinde takrîr-i da‘vâ edip merkūm Bünyamin yüz guruş mehr-i müeccel ile beni üç sene mukaddem tezevvüc edip taht-ı nikâhında iken talâk-ı selâse ile tatlîk edip ben dahi beni üç talâk boşadı deyü da‘vâ eylediğimde merkūm Bünyamin mukaddemâ inkâr eyledikde muvâcehesinde isbât edip talâka hükm-i hâkim lâhık olmuş idi. El-hâletü-hâzihî mehr-i müecceli olan meblağ-ı mastûr yüz guruş hakkımı merkūm Bünyamin’den taleb eylediğimde edâdan imtinâ‘ eder, suâl olunup teslîmine tenbîh olunmak matlûbumdur dedikde gıbbe’s-suâl merkūm Bünyamin cevâbında fi’l-hakīka hâl-i kazıyye müdde‘iye-i mezbûre Postire’nin takrîr-i meşrûhu üzere olup hâlen müdde‘iye-i merkūmeye vech-i mübeyyen üzere ma‘kūdün-aleyh olan yüz kıt‘a riyâlî guruş mehr-i müecceli zimmetimde vâcibü’l-kazâ deynimdir deyü bi-tav‘ihiikrâr ve i‘tirâf eyledikde ikrârı mûcebince meblağ-ı mastûr yüz guruşu müdde‘iye-i merkūmeye tamamen <> edâ ve teslîme merkūm Bünyamin Yahûdî’ye tenbîh olunup mâ-hüve’l-vâki‘ bi’l-ibtigā ketb olundu. Fi’l-yevmi’s-sâdis ve’l-işrîn min-Şevvali’l-mükerrem sene isneteyn ve seb‘în ve elf. Şuhûdü’l-hâl: Abdülbaki Çelebi b. Ahmed el-müezzin, Receb Efendi b. ( ) el-kādî, Mehmed Bey b. Ahmed el-bostânî, Mehmed Çavuş b. Abdullah, Mahmud Çelebi b. Ahmed, Mehmed Beşe b. Abdullah, Dilaver b. Abdullah el-muhtesib, İbrahim b. Dilaver el-muhzır