Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 882 Hüküm no: 1153 Orijinal metin no: [139b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristo v. Andriye’nin, Nikola v. Yorgi’den alacağı olduğu, ancak fazlasını talep etmemesi gerektiği Mahmiye-i İstanbul’da Kefeli mahallesinde sâkin Hristo v. Andriye nâm zimmî meclis-i şer‘-i şerîf-i lâzımü’t-teşrîfde Nikola v. Yorgi nâm zimmî muvâcehesinde üzerine da‘vâ ve takrîr-i kelâm edip mezbûr Nikola zimmetinde cihet-i karz-ı şer‘îden dokuz bin altı yüz akçe hakkım olup bundan akdem mezbûr Nikola’ya ikrâz ve teslîm edip mezbûr Nikola dahi iktirâz ve tesellüm eyledikden sonra sekiz yüz elli akçesi mezbûr Nikola ve iki bin akçesini mezbûr Nikola’nın oğlu Andriye bana edâ ve îfâ, ben dahi istîfâ edip bâkī altı bin yedi yüz elli akçe hakkım mezbûr Nikola zimmetinde kalmağın suâl olunup alıverilmesi matlûbumdur dedikde gıbbe’s-suâl mezbûr Nikola cevâbında müdde‘î-i mezbûrdan ancak altı bin altı yüz akçe iktirâz ve kabz ettiğimden sonra meblağ-ı mezbûr altı bin altı yüz akçeyi tamâmen müdde‘î-i mezbûr Hristo’ya def‘ ve teslîm eyledim deyû müdde‘î-i mezbûru ba‘zı da‘vâsında mukābele edip üç bin akçe ziyâde iktirâzını inkâr etmeğin müdde‘î-i mezbûrdan ziyâdeyi mübeyyine ve mezbûr Nikola[’dan] def‘-i mezbûrunu mübeyyine beyyine taleb olundukda her biri ityân-ı beyyineden izhâr-ı acz ile istihlâf etmeğin müdde‘î-i mezbûr Hristo’ya deyn-i mezbûrdan ahzını i‘tirâf ettiği iki bin sekiz yüz elli akçeden ziyâde ahz ve istîfâ etmediğine ve mezbûr Nikola’ya müdde‘î-i mezbûrdan iktirâzını i‘tirâf ettiği altı bin altı yüz akçeden ziyâde iktirâz ve kabz etmediğine yemîn teklîf olundukda her biri alâ vefki’l-mes’ûl yemîn billâhi’llezî enzele’l-İncîle [alâ] İsa aleyhi’s-selâm mûcebince üç bin yedi yüz elli akçeyi müdde‘î-i mezbûra edâya merkūm Nikola’ya tenbîh ve müdde‘î-i mezbûr bilâ-beyyine ziyâde da‘vâsından men‘ olunmağın mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Müstakīm Çavuş b. Kasım el-Mübâşir, Veli b. Mahmud, Hüseyin b. Ebûbekir, İbrahim b. Mehmed, Mustafa b. el-Hâc Ahmed, Mehmed b. Ramazan, Resul b. Rıdvan.