Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 63 Hüküm no: 4 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden ve çocukları Emine ile Veli’nin mirası üzerinde hak iddia eden Hüseyin b. Ebubekir’in iddiasının reddi Efendi hazretleri imzâsıyladır Mahmiye-i İstanbul’da Hâssa bostancılar kethüdâsı Ahmed Ağa’nın Başeskisi iken vefât eden Ali Bey b. Eğlence Musli’nin verâseti sulbî oğlu Veli’ye ve sulbiye kızı Emine’ye münhasıra olup ba‘dehû mezbûre Emine dahi vefât edip verâseti li-ebeveyn er karındaşı mezbûr Veli’ye münhasıra olup ba‘dehû mezbûr Veli dahi vefât etdikde işbu hâzır bi’l-meclis Mehmed nâm kimesne ile li-ebeveyn karındaşı gāib ani’l-meclis Ahmed nâm kimesne müteveffâ-yı mezbûr Veli’nin babası Ali Bey’in babası Eğlence Musli nâm mühtedînin li-ebeveyn karındaşı diğer Ali nâm mühtedînin sulbî oğlu Osman’ın sulbî oğulları olup mezbûrân diğer Ali ve Eğlence Musli’nin babaları ismi Kiragos ve anaları ismi Anna ve dedeleri ismi Karabet olduğu mezbûr Mehmed’in yedinde olan mazmûnu müsbet hüccet-i şer‘iyye nâtıka olduğu üzere nesebleri beyân olup sâbit olduğu şer‘an mütehakkık oldukdan sonra medîne-i Üsküdar’da Hacce Hatun mahallesinde sâkin Hüseyin b. Ebubekir nâm kimesne meclis-i şer‘de müteveffâ-yı mezbûr Veli’nin nısf terekesin kabz eden merkūm Mehmed mahzarında da‘vâ ve takrîr-i kelâm edip benim babam Ebubekir Ağa’nın babası İskender müteveffâ-yı mezbûr Veli’nin babasının babası mezbûr Eğlence Musli ile li-ebeveyn karındaşlar olup ben dahi mütevaffâ-yı mezbûr Veli’nin babasının li-ebeveyn ammi oğlunun oğlu olmağla vârisiyim hattâ mezbûr Veli’nin babası hayâtında ikrâr dahi etmiş idi, suâl olunup tereke-i müteveffâ-yı mezbûr Veli’nin sülüsün bana teslîme tenbîh olunmak matlûbumdur dedikde gıbbe’s-suâl mezbûr Mehmed müdde‘î-i mezbûr vech-i muharrer üzere müteveffâ-yı merkūm Veli’nin babasının li-evebeyn ammi oğlunun oğlu olduğunu inkâr edip ve müdde‘î-i mezbûrun müdde‘âsını isbât için getirdiği kimesneler ancak müteveffâ-yı mezbûr Ali Bey’in ikrârına şehâdet edip nesebleri suâl olundukda bilmeziz deyüp sâbitü’n-neseb asabe var iken mukarrun-lehû bi’n-neseb vâris olmamağla müdde‘î-i mezbûr vech-i muharrer üzere mu‘ârazadan men‘ olunmağın mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Cumâdelûla li-sene ihdâ ve semâmîn ve elf. Şuhûdü’l-hâl: Mehmed Çelebi b. Abdullah, fahrü’l-akrân Mehmed Ağa ser-muhzırân, umdetü’l-akrân Derviş Ağa kethüdâ-yı hazret efendi, Receb Beşe çukadâr efendi.