Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 64 Hüküm no: 5 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Efendi’nin torunu aleyhindeki menzil iddiasından vazgeçmesi Efendi hazretleri imzâsıyladır. Mahmiye-i İstanbul’da Cezerî Kasım Paşa mahallesinde sâkin iken bundan akdem vefât eden Ali Bey nâm kimesnenin babası Ömer Efendi nâm kimesne meclis-i şer‘-i şerîfde müteveffâ-yı mezbûrun sulbî sagīr oğlu Ali’nin vâlidesi olup umûrunu ikāmet için taraf-ı şer‘den vasî nasb u ta‘yîn olundukda vesâyet-i mezbûreyi kabûl edip menzil-i âti’l-beyâna vâzı‘atü’l-yed olan râfi‘atü’l-kitâb Hadîce bt. Abdülvahab nâm hatun mahzarında ikrâr ve takrîr-i kelâm edip müteveffâ-yı mezbûr hayâtında merhûm Cenderecizâde Muhyiddin Çelebi Vakfı’ndan icâreteyn-i ma‘lûmeteyn ile tasarrufunda olup mahalle-i mezbûrede vâki‘ ma‘lûmü’l-hudûd arsa üzerine izn-i mütevellî ile icâre-i mu‘accelesine mahsûb olmak üzere ebniye ihdâs edip mutasarrıf iken fevt oldukda arsa-i mezbûre tasarrufumda olup müteveffâ-yı mezbûr ebniye-i mezbûreyi malım ve emrim[le] benim için binâ etmiş idi deyü da‘vâ etmiş idim. Hâlâ da‘vâ-yı mezbûremden sagīr-i mezbûru ibrâ-i âmm-ı kâtı‘u’n-nizâ‘ ile ibrâ ve iskāt eyledim, menzil-i mezbûrun cemî‘ arsa ve ebniyesi müteveffâ-yı mezbûrdan intikāl-i âdî ile sagīr-i mezbûra intikāl etmeğin sagīr-i mezbûrun hakkıdır, benim kat‘an alâkam yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Cumâdelâhire li-sene ihdâ ve semânîn ve elf. Şuhûdü’l-hâl: Umdetü’l-akrân Derviş Ağa kethüdâ-yı hazret efendi, zahrü’l-emsâl Mehmed Ağa ser-muhzırân, Receb Beşe b. Ömer çukadâr, Ali Beşe b. Muharrem, Hızır Çelebi b. Mustafa.