Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 65 Hüküm no: 6 Orijinal metin no: [2a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi’nin eşini darbettiğini ileri sürdüğü Ali Çelebi aleyhindeki diyet davasında anlaşma sağlanması Mahmiye-i İstanbul’da Hoca Gıyaseddin mahallesi sükkânından Ali Çelebi b. Osman nâm kimesne kendi tarafından asâleten ve zevcesi Fâtıma bt. Mehmed nâm hatun tarafından husûs-ı âti’l-beyâna vekîl olup vekâleti zatını ma‘rifet-i şer‘iyye ile ârifân Hüseyin Efendi b. Abdülvahab ve Abdulkadir b. İsa nâm kimesneler şehâdetleriyle şer‘an sâbite oldukdan sonra vekâleten meclis-i şer‘-i şerîfde mahalle-i mezbûre sükkânından bâ‘isü’l-kitâb diğer Ali Çelebi b. el-Hâc Mustafa Beşe nâm kimesne mahzarında ikrâr ve takrîr-i kelâm edip târîh-i kitâbdan dokuz gün mukaddem zevcem ve müvekkilem mezbûre Fâtıma mahalle-i mezbûrede sâkine kız karındaşı Saime nâm hatunun menziline vardıkda mezbûr diğer Ali Çelebi maznûn-ı mezbûre Saime’nin menziline girip zevcem [2b] mezbûr Fâtıma başına şal örtüp kaçar iken mezbûr diğer Ali Çelebi ardından yetişip tutup başından şalın olup[alıp] bana koçul yoksa seni bıçak ile vururum deyü tahvîf ve zecr edip ba‘dehû zevcem mezbûre Fâtıma yedinden halâs oldukdan sonra târîh-i kitâbdan bir gün mukaddem müstebînü’l-hilka hayyen bir cenîn-i zeker ilkā edip bir sâ‘at mürûrundan sonra cenîn-i mezbûr fevt olmağla cenîn-i mezbûrun diyetini mezbûr diğer Ali Çelebi’den taleb etdiğimde mezbûr diğer Ali Çelebi bi’l-külliye inkâr etmekle beynimizde nizâ‘-ı küllî vukū‘undan sonra muslihûn tavassut edip mezbûr diğer Ali Çelebi ile beynimizde altmış esedî guruş üzerine inşâ-i akd-i sulh etdiklerinde ben dahi bi’l-asâle ve bi’l-vekâle sulh-ı mezbûru kabûl ve bedel-i sulh olan meblağ-ı mezbûr altmış esedî guruşu işbu meclisde yedinden ahz u kabz edip husûs-ı mezbûra müte‘allıka da‘vâdan zimmetini ibrâ-i âmm-ı kâtı‘u’n-nizâ‘la ibrâ ve iskāt eyledim dedikde gıbbe’t-tasdîk mezbûr diğer Ali Çelebi’nin babası mezbûr el-Hâc Mustafa Beşe b. el-Hâc Abdi nâm kimesne meclis-i mezbûrede mukırr-ı mezbûr Ali Çelebi mahzarında ikrâr ve takrîr-i kelâm edip oğlum mezbûr diğer Ali Çelebi’den müvekkile-i mezbûreye bir zarâr isâbet edip üzerinde hakkı sâbit olursa ben ol hakkına zâminim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Cumâdelâhire li-sene ihdâ ve semânîn ve elf. Şuhûdü’l-hâl: el-Hâc Süleyman Beşe ser-oda, Mehmed Beşe b. Oruç, Yusuf Beşe b. Abdullah, el-Hâc Ali b. Ahmed, el-Hâc Halil b. Ahmed.