Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 66 Hüküm no: 7 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacer Hatun’un eşi Hasan Çelebi’den muhâlaa yoluyla boşanması Mahmiye-i İstanbul’da Tercümân Yunus mahallesi sâkinelerinden Hacer bt. Sunullah nâm hatun meclis-i şer‘-i şerîf-i enverde zevc-i dâhilün-bihâsı olan işbu râfi‘ü’l-kitâb Hasan Çelebi b. Hüseyin muvâcehesinde ikrâr ve takrîr-i kelâm edip zevcim mezbûr Hasan Çelebi zimmetinde mütekarrir olan iki bin beşyüz akçe mehr-i müeccelimden fâriğa ve nafaka-i iddet-i mu‘ayyene-i ma‘lûmem ve me’ûnet-i süknâm kendi üzerime olup ve mezbûrun firâşından hâsıl ve benden mütevellide olup iki yaşında olan sulbî sagīr oğlum Mustafa’yı dahi târîh-i kitâbdan beş seneye varıncaya değin kendi malımdan meccânen infâk ve iksâ etmek üzere zevcim mezbûr Hüseyin Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra hukūk-ı zevciyete müte‘allıka da‘vâ ve mütâlebât ve eymân ve muhâsamâtdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-Cumâdelâhire li-sene ihdâ ve semânîn ve elf. Şuhûdü’l-hâl: Salih Çavuş el-mübâşir, Mehmed b. Yusuf, Abdullah b. Mahmud, Mustafa b. Mehmed, İbrahim Çelebi b. Seydi.