Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 66 Hüküm no: 8 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapsedilen Nikola v. Yorgi’nin iflasına karar verilerek hapisten çıkarılması Hüccet-i iflâs Mahmiye-i İstanbul’da Balat kurbünde Abdisubaşı mahallesi ahâlîsinden gāib ani’l-meclis Ali Çelebi nâm kimesneye cihet-i kefâletden deyn olan beş bin üç yüz otuz akçe için yedi aydan beri sicn-i sultânîde mahbûs olan Nikola v. Yorgi nâm zimmîden vech-i âtî üzere istişhâd-ı şer‘î sudûrundan sonra mahmiye-i mezbûrede Hızırçavuş mahallesi sükkânından olup Balat kurbünde turşucu olan İbrahim Beşe b. Şa‘bân ve Müftü Ali Çelebi mahallesi ahâlîsinden olup mahmiye-i mezbûrede Balat kurbünde doğramacı olan Süleyman b. Osman nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûre Nikola’nın kirâren ve mirâren hâlini istifsâr edip müflis ve mu‘dim olup lâbis olduğu libâsından mâ‘adâ ismi mâl ıtlâk olunur nesnesi olmadığı ma‘lûmumuz olmağla müsteşhid-i merkūmun kudret-i mâl [ve] vüs‘at-i hâle vusûlüne değin hapisden ıtlâk olunup imhâl ve sebîli tahliye olunması şer‘an lâzım olduğuna biz şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde yesârına şâhid olmamağla hâkim-i muvakkı‘-ı sadr-ı kitâb tûbâ lehû ve hüsnü-meâb hazretleri gıbbe ri‘âyet-i şerâiti’l-kabûl şehâdetleri kabûl ve mûcebince müsteşhid-i mezbûr Nikola’nın iflâsına hüküm ve kazâ edip müsteşhid-i mezbûrun zevcesi Zenbilya bt. Dimitri nâm Nasrâniye ile sâlifü’z-zikr Abdisubaşı mahallesi sükkânından Lambernos v. Nikola nâm zimmî müsteşhid-i mezbûrun nefsine kefîl olduklarından sonra müsteşhid-i mezbûr Nikola’yı hapisden ıtlâk edip yesârı sübûtuna değin sebîlini tahliye etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Cumâdelûlâ li-sene ihdâ ve semânîn ve elf. Şuhûdü’l-hâl: Mehmed Çelebi b. Abdullah, Mustafa Çelebi b. el-Hâc Ahmed, Şükrullah Bey b. Mustafa, Abdi Çelebi b. Hüseyin, Mehmed b. Ramazan.