Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 67 Hüküm no: 10 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin Rus asıllı cariyesi Gülistan’ı azat etmesi Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlde Mevlânâ Ömer Efendi b. İsmail İrsâl olunup ol dahi bi’l-fi‘il Sultan Selim Hân -aleyhi’r-rahmetü ve’l-gufrân- câmi‘-i şerîfi ve ma‘bed-i latîfinin muvakkiti olan umdetü’l-akrân Mustafa Çelebi b. Mehmed’in mahmiye-i İstanbul’da Cebecibaşı mahallesinde vâki‘ menziline varıp zeyl-i rakīmde isimleri terkîm olunan udûl-ı Müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde merkūm Mustafa Çelebi meclis-i ma‘kūd-ı mezbûrda tav‘an ve rakabeten ikrâr-ı tâm ve takrîr-i kelâm edip bana rıkkıyetini mu‘terife olan orta boylu sarı kaşlı gök gözlü Rusiyyetü’l-asl bâ‘isetü hâze’l-kitâb Gülistan bt. Abdullah nâm câriye-i memlûkemi hasbeten lillahi’l-hallâk ve taleben li-merzâti’r-rabbühü’r-rezzâk tahrîr ü i‘tâk ve zümre-i ahrâr-ı asliyâta ilhâk eyledim, ba‘de’l-yevm mevsûfe-i mezbûre Gülistan sâir harâir-i asliyât gibi hürre olup üzerinde mevâlî için şer‘an sâbit olan hakk-ı velâdan gayrı hakkım kalmadı dediğini mevlânâ-yı mezbûr mahallinde tahrîr ba‘dehû ma‘an irsâl olunan el-Hâc İbrahim Çelebi b. Mahmud ve Mehmed Çelebi b. Abdüsselam ile meclis-i şer‘-i hatîre gelip alâ-vukū‘ihi inhâ ve takrîr eyledikde mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Cumâdeluhrâ li-seneti ihdâ ve semânîn ve elf. Şuhûdü’l-hâl: Mehmed Efendi b. Mehmed Efendi el-imâm, Ahmed Efendi b. eş-Şeyh Mehmed Efendi imâm-ı mahalle, Abdullah Efendi b. eş-Şeyh Mehmed Efendi, Ahmed Çelebi b. Mehmed el-müezzin, Mehmed Beşe b. Mehmed.