Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 68 Hüküm no: 11 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin Bağdasar v. David aleyhindeki hırdavat eşyası davasında anlaşma sağlanması Hurdacı tâifesinden olup mahmiye-i İstanbul’da Emin Nureddin mahallesi sâkinlerinden olan Mustafa Beşe b. Abdullah nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda tâife-i mezbûreden olup mahmiye-i mezbûrede Küçükkaraman kurbünde Mimârsinan mahallesi sükkânından olup Bağdasar v. David nâm zimmî muvâcehesinde bi’t-tav‘i’s-sâf ikrâr u i‘tirâf edip mezbûr Bağdasar Kırkçeşme’de Gazanfer Ağa Medresesi kurbünde ( ) nâm hatunun tasarrufunda olan hurdacı dükkânında olan beynimizde ma‘lûme hırdavâtı târîh-i kitâbdan dört sene mukaddem yedi bin akçe semen-i makbûza bana bey‘ ve teslîm edip, ben dahi iştirâ ve kabûl ve kabz ve tesellüm eylediğimden sonra bundan akdem mezbûr Bağdasar’dan bana vech-i mübeyyen üzere bey‘ eylediğin hurdacı gediği idi, gedik bey‘i câiz değildir deyü meblağ-ı mezkûru da‘vâ eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuş idi. El-Hâletü hâzihi muslihûn tavassut edip mezbûr Bağdasar ile beynimizde beş yüz akçe üzerine inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezkûr beş yüz akçeyi mezbûr Bağdasar yedinden alıp kabz edip husûs-ı mezkûra müte‘allıka âmme-i de‘âvî ve mutâlebâtdan mezbûr Bağdasar’ın zimmetini ibrâ-i âmm-ı katı‘u’n-nizâ‘ ile ibrâ eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Cumâdelûlâ li-seneti ihdâ ve semânîn ve elf. Şuhûdü’l-hâl: Hurdacılar Kethüdâsı Antalyavî Musa Beşe, İsmail b. Kanber, Tımarhâneci Musa b. Rıdvan, Abdurrahman b. İbrahim, Abdünnebi Ağa Beşe b. Pîrzâde.