Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 68 Hüküm no: 12 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Ağa’nın fırınını Hassa tabiplerinden Mustafa Efendi’ye satması Dârü’l-hilâfeti’l-aliyye Kostantıniyyetü’l-mahmiyede Molla Aşkī mahallesi sükkânından Sinan Ağa b. Mehmed nâm kimesne meclis-i şer‘-i şerîfde hâlâ Etibbâ-yı hassa reisi olan umdetü’l-etibbâi’l-hâzikīn zübdetü’l-hukemâi’r-râsihîn Mustafa Efendi b. Abdülmuin tarafından zikri âtî fırın iştirâ ve def‘-i semene vekîl olduğu Şa‘bân b. Mustafa ve es-Seyyid Ebubekir Çelebi b. Ahmed nâm kimesneler <> şehâdetleri ile sâbit olan işbu râfi‘ü’l-kitâb Ivaz Çelebi b. Hasan nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan ba‘zan Ferruh Kethüdâ Vakfı olan arsa ve ba‘zan Ayasofya-i kebîr Vakfı’ndan olup Yağcı Fırını demekle ma‘rûfe Sultan nâm nasrâniye tasarrufunda olan menzil ve üç tarafdan tarîk-i âm ile mahdûd bir su kuyusunu müştemil bir harâbe fırınımız vekîl-i mezbûr Ivaz Çelebi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile altıyüz yirmi esedî guruşa bey‘ ve teslîm, mezbûr Ivaz Çelebi dahi müvekkili mûmâ-ileyh Mustafa Efendi için iştirâ ve tesellüm etdikden sonra semen-i mezbûr altı yüz yirmi guruşu vekîl-i mezbûr Ivaz Çelebi yedinden tamâmen ahz u kabz eyledim. Min-ba‘d mârrü’z-zikr fırın müvekkil-i mûmâ-ileyh Mustafa Efendi’nin mülk-i müşterâsıdır, keyfe-mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Cumâdelâhire li-sene ihdâ ve semânîn ve elf. Şuhûdü’l-hâl: Mehmed Efendi b. eş-Şeyh Osman Efendi el-imâm, Ahmed Halîfe b. Abdurrahman el-müezzin, Osman Çelebi b. Mehmed Efendi, Mehmed b. Ahmed, Mehmed Halîfe b. Mustafa el-kayyûm.