Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 69 Hüküm no: 13 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Sefer’in eşi Mehmed’den muhâlaa yoluyla boşanması Mahmiye-i İstanbul hısnı ebvâbından Eğrikapı dâhilinde Avcıbey mahallesi ahâlîsinden Mehmed b. Hüseyin nâm Kıbtî’nin zevcesi olup hâmili olan Hadîce bt. Sefer nâm Kıbtiye meclis-i şer‘-i şerîf-i enver ve mahfil-i dîn-i münîf-i ezherde zevci işbu râfi‘ü’l-kitâb mezbûr Mehmed muvâcehesinde ikrâr ve takrîr-i kelâm edip mezbûr Mehmed zimmetinde mütekarrir olan üç bin akçe mehr-i müeccelim ve altı ay nafaka-i iddetim üzerlerine ve mezbûr Mehmed’den olan hamlimi vaz‘ etdikde tevellüd eden veledini yedi seneye değin kendi malımdan şer‘an infâk etmek üzere ve me’ûnet-i süknâm dahi kendi üzerime olmak üzere hul‘ olup mezbûr Mehmed dahi hul‘-ı mezbûru kabûl eyledikden sonra hukūk-ı zevciyete müte‘allıka cemî‘ de‘âvî ve mütâlebât ve eymân ve muhâsamâtdan her birimiz âharın zimmetini ibrâ-i küllî ile ibrâ ve iskāt eyledik dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Cumâdeluhrâ li-seneti ihdâ ve semânîn ve elf. Şuhûdü’l-hâl: Hasan b. Ömer, Mehmed b. Osman, Mustafa Çelebi b. Ahmed, İbrahim Çelebi b. Ahmed.