Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 70 Hüküm no: 15 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un cariyesi Giritli Şahbaz’ı azat etmesi Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden Mevlânâ Ömer Efendi b. İsmail irsâl olunup ol dahi bi’l-fi‘il Sultan Selim Hân -aleyhi’r-rahmetü ve’l-gufrân- Câmi‘-i şerîfi ve ma‘bed-i latîfinin muvakkiti olan umdetü’l-akrân Mustafa Çelebi b. Mehmed’in mahmiye-i İstanbul’da Cebecibaşı mahallesinde vâki‘ menziline varıp zeyl-i rakīmde isimleri terkîm olunan udûl-ı Müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde merkūm Mustafa Çelebi Zevce-i menkûhası Râbi‘a bt. Mustafa nâm hatun tarafından husûs-ı câi’l-beyâna vekîl olduğu zâtını ma‘rifet-i şer‘iyye ile ârifân olup câmi‘-i şerîf-i mezkûr imâreti kilârcısı olan İbrahim Çelebi b. Ali ve Kovacıdede mahallesi sâkinlerinden Sepetçi İbrahim Beşe b. Mehmed nâm kimesneler şehâdetleriyle şer‘an sâbit oldukdan sonra meclis-i ma‘kūd-ı mezbûrda ikrâr-ı tâm ve takrîr-i kelâm edip müvekkilem mezbûre Râbia Hatun kendüye rıkkını mu‘terife olan bâ‘isetü hâze’l-kitâb orta boylu, kara kaşlı, kara gözlü sağ gözü bir telâz? Giridiyyetü’l-asl Şahbaz bt. Abdullah nâm câriye-i memlûkesini hasbeten lillâhi te‘âlâ ve taleben li-merzâti’r-rabbi’l-a‘lâ tahrîr ve i‘tâk ve zümre-i harâir-i asliyâta ilhâk eyledi. Ba‘de’l-yevm mevsûfe-i mezbûre Şahbaz sâir harâir-i asliyât gibi hürre olup müvekkilemin üzerinde mevâlî için şer‘an sâbit olan hakk-ı velâdan gayrı hakkı kalmadı dediğini mevlânâ-yı mezbûr mahallinde tahrîr ba‘dehû ma‘an irsâl olunan el-Hâc İbrahim Çelebi b. Mahmud ve Mehmed Çelebi b. Abdüsselam ile meclis-i şer‘-i hatîre gelip alâ-vukū‘ihi inhâ ve takrîr eyledikde mâ-hüve’l-vâki‘ bi’l-ibtigā ketb ü imlâ olundu. Fi’l-yevmi’s-sâlis min-Cumâdeluhrâ li-seneti ihdâ ve semânîn ve elf. Şuhûdü’l-hâl: Mehmed Efendi b. eş-Şeyh Mehmed Efendi imâm-ı câmi‘-i Sultan Selim, Ahmed Efendi b. eş-Şeyh Mehmed Efendi imâm-ı mahalle-i mezbûr, Ahmed Çelebi b. Mehmed el-müezzin, Mehmed Beşe b. Mehmed.