Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 71 Hüküm no: 16 Orijinal metin no: [3b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaşı küçük Havva’nın eşi Ali’den muhâlaa yoluyla boşanması Mahmiye-i İstanbul’da Kâtib Muslihiddin mahallesi sükkânından Salih b. Abdullah nâm kimesne ile zevcesi Melike bt. Abdullah nâm hatun meclis-i şer‘-i şerîfde sagīre kızları Havva’nın zevci Ali b. Mehmed nâm kimesne mahzarında her biri ikrâr-ı tâm ve takrîr-i kelâm edip sagīre-i mezbûre Havva’nın zevci mezbûr Ali zimmetinde mütekarrir olan iki bin akçe mehr-i müeccelini biz zâmin olmak üzere mezbûr Ali ile sagīre-i mezbûrenin iki bin akçe mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi bizim üzerimize olmak üzere muhâla‘a-i sahîha-i şer‘iyye ile muhâla‘a edip mezbûr Ali dahi hul‘-ı mezbûru kabûl etdikden sonra sagīre-i mezbûrenin mehr-i mezbûrunu biz zâmin olduk dediklerinde mukırrân-ı mezbûrânı ikrâr-ı meşrûhlarında mezbûr Ali bi’l-muvâcehe tasdîk ve tahkīk etmeğin mâ-vaka‘a bi’t-taleb ketb olundu. [4a] fi’l-yevmi’s-sâlis min-Cumâdelâhire li-seneti ihdâ ve semânîn ve elf. Şuhûdü’l-hâl: Mehmed b. Abdünnebi, Osman b. Şa‘bân, Şükrullah Bey b. Mustafa, Veli b. Mahmud, İbrahim Çelebi b. Mehmed, Mehmed b. Ramazan