Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 71 Hüküm no: 17 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali ile Mustafa’nın Çerkeş’in Ağaköyü’ndeki menzil, harman yeri ve tarlalarını satmaları Fi’l-asl vilâyet-i Anadolu’da Çerkeş kazâsına tâbi‘ Ağaköy nâm karye ahâlîsinden olup hâlâ medîne-i Ebâ Eyyûb Ensârî -radiye anhu Rabbühü’l-bârîde- İdris Köşkü kurbünde Zeyneb Hatun mahallesinde sâkin Ali b. Rasûl ile li-ebeveyn karındaşı oğlu Mustafa b. İsa nâm kimesnelerden [her]biri meclis-i şer‘-i şerîf-i enverde mahfil-i dîn-i münîf-i ezherde işbu bâ‘isü’l-kitâb diğer Mustafa b. Bayram Hatib nâm kimesne mahzarında her biri ikrâr ve takrîr-i kelâm edip akd-i âti’z-zikrin sudûruna değin ale’l-iştirâk mülkümüz olup karye-i mezbûrede vâki‘ iki tarafdan Hacı Yusuf oğulları Mehmed ve Ahmed nâm kimesneler mülkleri ve bir tarafdan Abdullah b. Musa nâm kimesne mülkü ve bir tarafdan mer‘â ile mahdûd mülk menzil ve bir samanhâne yerleri ve mülk bir harman yeriyle hudûdu beynimizde ma‘lûm bir kıt‘a bahçe yerlerini safka-i vâhide ile mezbûr diğer Mustafa’ya tarafeynden îcâb ve kabûlü hâvî bey‘-i kat‘î ile üç bin akçeye bey‘, ol dahi iştirâ ve kabûl eyledikden sonra yine tefvîz-i câi’z-zikrin sudûruna değin taht-ı tasarrufumuzda olup karye-i mezbûre sınırı dahilinde vaki‘ beyne’l-ahâlî ve’l-cîrân ma‘lûmü’l-hudûd tahmînen dört müd tohum istî‘âb eder tarlalarımızın hakk-ı tasarruflarını dahi ma‘rifet-i sâhib-i arz ile mezbûr diğer Mustafa’ya üç bin akçe bedel mukābelesinde ferâğ ve tefvîz, ol dahi tefevvüz ve kabûl eyledikden sonra semen-i mezbûr üç bin akçe ile bedel-i mezkûr üç bin akçe ki cem‘an altı bin akçeyi mezbûr diğer Mustafa yedinden tamâmen ahz u kabz edip emlâk-i mezkûre ile arâzi-yi mezkûreyi mahallerinde kabz ve tasarrufa merkūm diğer Mustafa’ya taslît eyledik ba‘de’l-yevm emlâk-i mezbûre mezbûr diğer Mustafa’nın mülk-i müşterâsı ve arâzi-yi mezkûre hakk-ı müfevvezidir. Keyfe mâ yeşâ ve yahtâr mutasarrıf olsun dediklerinde gıbbe’t-tasdîkı’ş-şer‘î mâ-hüve’l-vaki‘ bi’t-taleb ketb olundu. Fi’l-yevmi’s-sâbi‘ min-Cumâdeluhrâ li-seneti ihdâ ve semânîn ve elf. Şuhûdü’l-hâl: Ahmed b. Zülfikar, Mahmud b. ( ), Gülabi b. Hasan, Receb b. İbrahim, İsa b. Receb, Yahya b. Kemâl, İbrahim Hakkı b. Ahmed.