Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 72 Hüküm no: 18 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maroya’nın Yorgaki aleyhindeki alacak davasında anlaşma sağlanması Mahmiye-i İstanbul’da Tahtaminare mahallesinde vâki‘ Bostancıbaşı Odaları demekle ma‘rûf odalardan birinde sâkine Maroya bt. Bolharovini nâm Nasrâniye meclis-i şer‘-i şerîfde bâ‘isü’s-sifr Estemad v. Nikola nâm zimmî tarafından ikrârü’l-beyânı tasdîka vekîl olup vekâleti bi-mâ hüve tarîkı’s-sübût şer‘an sâbite olan Yorgaki v. İstavrino nâm zimmî muvâcehesinde ikrâr ve takrîr-i kelâm edip târîh-i kitâbdan ( ) mukaddem on bin akçemi mezbûr İstemad’a ikrâz ve teslîm, mezbûr İstemad dahi ba‘de’l-iktirâz ve’t-tesellüm mukābelesinde bir sîm hançer ve bir altın yüzük ve bir sırmalı yasdık ve bir sepet sandığı ve bir sîm sagīr bıçak ve iki çift sîm küpe ve iki çift gömlek ve beş zirâ‘ beyâz dimî ve bir kırmızı tennûr kuşak ve bir mâvi bez kuşak ve bir mavi sarık ve bir kırmızı kelle pûş ve bir peştemâl ve on makrama ve bir deste kaşık ve bir bakır fânus ve üç sîm kadehi bana rehin vaz‘ ve teslîm, ben dahi irtihân ve kabz etdiğimden sonra meblağ-ı mezbûru mezbûr İstemad’dan ahz ve eşyâ-i mezbûresin teslîm murâd etdiğimde mezbûr İstemad meblağ-ı mezbûru iktirâzın inkâr ve eşyâ-i mezbûreyi îdâ‘ etmiş idim demekle beynimizde münâza‘ât-ı kesîre vâkı‘a olmuş idi. El-hâletü hâzihi muslihûn tavassut edip mezbûr İstemad ile beynimizde iki bin akçe üzerine inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki bin akçeyi mezbûr İstemad yedinden tamâmen ahz u kabz ve eşyâ-i mezkûresin mezbûr İstemad’a teslîm, ol dahi yedimden ahz u kabz etdiğinden sonra mezbûr İstemad ile husûs-ı mezbûra müte‘allıka da‘vâdan her birimiz âharın zimmetini ibrâ-i âmm-ı kâtı‘u’n-nizâ‘ ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-Cumâdeluhrâ li-seneti ihdâ ve semânîn ve elf. Şuhûdü’l-hâl: Ahmed Çelebi b. eş-Şeyh Ahmed, İbrahim Beşe b. er-râcil, Bektaş Bey b. Eyüb el-mübâşir, Bayram Çelebi b. ( ) attâr, Mustafa attâr.