Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 73 Hüküm no: 19 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Efendi’nin vefat eden Sürekçi Hıristo’da olan alacağının oğlu Petro’dan tahsili Husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ İbrahim Efendi b. eş-Şeyh Hızır irsâl olunup ol dahi sâbıkā Şıkk-ı evvel defterdârı kāimmakāmı olup hâlâ Surre Emîni olan umdetü’l-emâcid ve’l-ekârim câmi‘ü’l-mehâsin ve’l-mekârim zü’l-kadri’r-refî‘ ve’l-câhi’l-menî‘ Yusuf Efendi b. Hüseyin’in mahmiye-i İstanbul’da Mimârsinan mahallesinde sâkin oldukları sa‘âdethânelerine varıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i şerîf etdikde vilâyet-i Rumili’de Hezargrad kazâsına tâbi‘ Arnavudköyü nâm karye ahâlîsinden iken bundan akdem hâlik olan Sürekçi Hıristo v. Hıristo’nun sulbî kebîr oğlu ve hasren vârisi olan Petro nâm zimmî meclis-i şer‘-i ma‘kūd-ı mezbûrda işbu bâ‘isü’l-kitâb mûmâ-ileyh Yusuf Efendi mahzarında ikrâr ve takrîr-i kelâm edip, babam [4b] hâlik-i mezbûr târîh-i kitâbdan dört sene mukaddem mûmâ-ileyh Yusuf Efendi’den bi-tarîkı’l-mudârebe ahz u kabz etdiği dört bin esedî guruş i‘mâl üzere iken kable’t-teslîm hâlik olup ve mûmâ-ileyh Yusuf Efendi meblağ-ı mezbûrun bin esedî guruşun da‘vâdan benim zimmetimi ibrâ ve iskāt etmekle ben dahi bâkī üç bin esedî guruşun babam hâlik-i mezbûrun terekesinden tedrîc ile mûmâ-ileyh Yusuf Efendi’ye teslîme ta‘ahhüd eyledim dedikde gıbbe’t-tasdîk husûs-ı mezbûru mevlânâ-yı mezbûr mahallinde tahrîr ba‘dehû ma‘an irsâl olunan İbrahim Çelebi b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Cumâdeluhrâ li-sene ihdâ ve semânîn ve elf. Şuhûdü’l-hâl: Mustafa Efendi b. Ahmed tabib-i hâssa, Mehmed Ağa b. Hasan, Ahmed Yazıcı b. Ali, Mustafa Çelebi b. Ali, Ali Beşe b. Mahmud.