Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 73 Hüküm no: 20 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un Ayşe Hatun Vakfı’na borcu olduğunu ikrâr etmesi Husûs-ı âti’l-beyânı mahallinde tahrîr için gıbbe’l-iltimâs kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi mahmiye-i İstanbul’da Kefeli mahallesinde mefharü’l-müderrisîni’l-kirâm zübdetü’l-muhakkıkīni’l-fihâm Osman Efendi’nin sâkin olduğu menzile varıp zeyl-i vesîkada muharrerü’l-esâmî olan Müslimîn huzûrunda akd-i meclis-i şer‘-i şerîf eyledikde mahmiye-i mezbûrede Koska Fırını kurbünde Kızıltaş mahallesi sâkinelerinden Kasım Ağazâde merhûm Ali Ağa’nın zevce-i metrûkesi olup mezbûrenin zâtı İmam Ali Efendi b. Mehmed ve Vâhide Hatun b. Abdullah ve Gevher Hatun bt. Abdullah ta‘rîfleri ile mu‘arrefe olan mefharü’l-muhadderât Afife Hatun bt. Hüseyin Ağa meclis-i ma‘kūd-ı mezbûrda kendi vakfına meşrûtiyet üzere mütevellîye olan işbu bâ‘isetü’l-vesîka Âişe Hatun bt. Sefer Efendi mahzarında ikrâr ve takrîr-i kelâm edip mezbûre Âişe Hatun yedinden kendi vakfı olan maldan dört yüz otuz beş kıt‘a esedî guruşu istidâne ve kabz ve mesârifime sarf ve istihlâk ile deynim olduğundan mâ‘adâ semen-i târîh-i kitâbdan üç yüz altmış gün tamâmına müeccel ve mev‘ûd kezâlik mezbûre Âişe Hatun’un Vakfı’ndan olup yedinden iştirâ ve kabz eylediğim İbni Hümâm kitâbı semeninden altmış beş kıt‘a guruş ki cem‘an beş yüz kıt‘a esedî guruş vakf-ı mezbûra vâcibü’l-edâ ve lâzımü’l-kazâ deynimdir dedikde gıbbe’t-tasdîkı’ş-şer‘î mahmiye-i mezbûrede Molla Gürânî mahallesinde sâkine Âişe Hanım bt. Kasım Ağa ile Kaliçeciler Köşkü kurbünde sâkine diğer Âişe Hatun bt. Bali’den her biri meblağ-ı mezbûr beş yüz esedî guruşa tarafeynden emr ü kabûlü hâviye kefâlet-i sahîha-i şer‘iyye ile kefîl olduklarında vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mehmed b. Ahmed ve Ebubekir b. Hüseyin ile meclis-i şer‘a gelip alâ-vukū‘ihi inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Cumâdeluhrâ li-seneti ihdâ ve semânîn ve elf. Şuhûdü’l-hâl: Mefharü’l-müderrisîni’l-kirâm Osman Efendi b. Mehmed Efendi, mefharü’l-müderirsîni’l-kirâm Mehmed Efendi b. Rızâyî, Ali Efendi b. Mehmed, Mehmed b. Receb, Ali Çelebi b. Receb.