Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 74 Hüküm no: 21 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin ortaklaşa oturdukları menzildeki bazı eşyaların eşi Râbia’ya ait olduğunu tastik etmesi Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden Mevlânâ Ömer Efendi b. İsmail irsâl olunup ol dahi bi’l-fi‘il Sultan Selim Hân -aleyhi’r-rahmetü ve’l-gufrân- Câmi‘-i şerîfi ve ma‘bed-i latîfinin muvakkiti olan umdetü’l-akrân Mustafa Halil b. Mehmed’in mahmiye-i İstanbul’da Cebecibaşı mahallesinde vâki‘ sâkin olduğu menzile varıp zeyl-i rakîmde isimleri terkîm olunan udûl-ı Müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde merkūm Mustafa Çelebi meclis-i ma‘kūd-ı mezbûrda zevce-i menkûhası Râbi‘a bt. Mustafa nâm hatun tarafından husûs-ı câi’l-beyâna vekîl olduğu zâtı ma‘rifet-i şer‘iyye ile ârifân Çukurbostan mahallesi sâkinlerinden Sultan Selim Hân İmâreti kilârcısı İbrahim Çelebi b. Ali ve Koğacıdede mahallesi sâkinlerinden Mestçi İbrahim Beşe b. Mehmed nâm kimesnelerin şehâdetleri ile şer‘an sâbit olan Ahmed Çelebi b. Mehmed mahzarında bi’t-tav‘i’s-sâf ikrâr u i‘tirâf edip nısf şâyi‘i benim ve nısf-ı şâyi‘-i âharı müvekkile-i mezbûre Râbi‘a Hatun’un mülkü olup mahalle-i mezbûrede vaki‘ bir tarafdan tarîk-i hâs ve bir tarafdan ulemâya meşrûta vakıf menzil ve bir tarafdan Aydın Çavuş Hatunu demekle ma‘rûfe Fâtıma nâm Hatun Vakfı ve bir tarafdan ba‘zan Kadri Çelebi mülkü ve ba‘zan tarîk-i âm ile mahdûd müvekkile-i mezbûre ile ma‘an sâkin olduğumuz menzil içinde olan eşyâdan mâvi çukaya kaplı bir sırt zerdava kürk ve fıstikî çukaya kaplı bir samur paçası kürk ve deve tüyü çukaya kaplı bir müsta‘mel samur paçası kürk ve bir yeşil çuka ferâce ve bir surmâyî çuka yeşil mellûte ve biri erguvânî ve biri beyâz iki kutnî kaftan ve iki Şile alacası kaftan [5a] ve iki benefşe diz çakşırı ve dört müsta‘mel yemenî yorgan ve bir beledî döşek ve sekiz çuka yasdık ve üç müsta‘mel çuka mak‘ad ve dört minder ve bir müsta‘mel Selanik orta keçesi ve dört velense ve iki Yanbolu kebesi ve bir pîştahta ve on beş kum sâ‘ati ve beş fağfûrî fincan ve iki kahve ibriği ve bir leğen ve bir ibrik ve bir pirinç mangal ve bir kır? fânus ve bir sedef-kârî mücmer ve bir ceviz ağaç iskemle ve bir koyun sâ‘atinden ve hâlâ üzerimde lâbis olduğum libâsımdan mâ‘adâ benim ismi mâl ıtlâk olunur bir nesnem yokdur, mâ‘adâ menzil-i mezbûr içinde olan esâs-ı beyt ve evânî-i nühâsiye ve gayr-ı nühâsiye kalîl ü kesîr celîl ü hakīr her ne var ise cümlesi zevcem mezbûre Râbia Hatun’un mülkü hakkıdır vechen mine’l-vücûh ve sebeben mine’l-esbâb benim alâkam yokdur dedikde gıbbe’t-tasdîk husûs-ı mezbûru mevlânâ-yı mezbûr mahallinde tahrîr ba‘dehû ma‘an irsâl olunan el-Hâc İbrahim Çelebi b. Mahmud ve Mehmed b. Abdüsselam ile meclis-i şer‘-i hatîre gelip alâ-vukū‘ihi inhâ ve takrîr eyledikde mâ-vaka‘a bi’t-taleb ketb olundu. Fi’l-yevmi’s-sâlis min-Cumâdeluhrâ li-seneti ihdâ ve semânîn ve elf. Şuhûdü’l-hâl: Umdetü hameleti’l-Kur’ân Mehmed Efendi b. eş-Şeyh Mehmed Efendi el-imâm, zübdetü hameleti’l-Kur’ân Ahmed Efendi b. eş-Şeyh Mehmed Efendi el-imâm, Abdullah Efendi b. eş-Şeyh Mehmed Efendi, Yusuf Beşe b. Abdullah.