Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 75 Hüküm no: 22 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Ağa’nın varislerinden Meryem Hatun’un diğer varis Hatice aleyhindeki miras davasından men olunması Mahmiye-i İstanbul’da Seydi Halîfe mahallesinde sâkin iken bundan akdem vefât eden Mustafa Ağa b. Hüseyin’in verâseti zevce-i metrûkeleri Hadîce bt. Abdullah ve Fâtıma bt. İbrahim ve Âişe bt. Abdullah ile sulbî kebîr oğulları Yahya Çelebi ve İbrahim Çelebi’ye ve sulbiye kebîre kızı Meryem Hatun’a münhasıra ve tashîh-i meselesi yüz yirmi sehmden olup sihâm-ı mezbûreden beşer sehmi mezbûrat Hadîce ve Fâtıma ve Âişe’den her birine ve kırk ikişer sehmi mezbûrân Yahya ve İbrahim Çelebi’den her birine ve yirmi bir sehmi mezbûre Meryem Hatun’a isâbet etdiği şer‘an sâbit oldukdan sonra mezbûre Meryem Hatun’un zevci ve tarafından husûs-ı âti’l-beyâna vekîl olup vekâleti zâtını ma‘rifet-i şer‘iyye ile ârifân Mustafa Çelebi b. Hüseyin ve Bayram Çelebi b. Abdullah nâm kimesneler şehâdetleri ile şer‘an sâbite olan Mustafa Çelebi b. Musa nâm kimesne meclis-i şer‘-i şerîfde işbu bâ‘isetü’l-kitâb mezbûre Hadîce mahzarında üzerine da‘vâ ve takrîr-i kelâm edip mezbûre Meryem müteveffâ-yı mezbûr Mustafa Ağa’nın terekesinden yeşil çuka kaplı bir samur çürük? [kürk] ve altı Bursa yasdık ve altı sâde kadife yasdık ve beş münakkaş yasdık ve beş minder ve on iki köhne yemenî yorgan ve bir dülbend sırma münakkaş yorgan ve bir kebîr orta keçesi ve üç sagīr orta keçesi ve altı köhne yan keçesi ve bir köhne yemenî perde ve iki kumaş perde ve iki seccâde ve beş kırmızı velence ve bir mor velence ve bir beyâz velence ve üç Yanbolu kebesi ve iki kırmızı kilim ve üç köhne yemenî yasdık ve iki köhne dimî yasdık ve bir sedef-kârî ayna ve bir sedef-kârî pîştahta ve bir sâde ceviz pîştahta ve bir sedef-kârî devâd ve bir kırmızı sof ferâce ve bir mor çuka kürk kaplı ve bir mükemmel hamam rahtı ve bir prinç şam‘dân ve dört güğüm ve dokuz sahan ve bir kefkîr sahan ve iki tâbe ve dört ibrik ve dört leğen ve sekiz tencere ve iki kazgan ve iki sepet sandığı ve iki ayaklı sandık ve on üç Mısır hasırı ve on kaba hasır ve bir büyük sini ve iki tepsi ve bir bakraç ve iki kahve bakracı ve iki tas ve bir havan ve bir sedef-kârî buhûrdân ve dört köhne kapı perdesi ve bir yemenî peşkir ve bir tire peşkiri ve bir dokuma peşkiri ve iki fağfûrî fincan ve bir akçe tahtası ve bir ihrâm ve bir mushaf-ı şerîf ve iki tefsîr-i şerîf ve üç döşek kılıfını bi-gayr-ı hakkın ahz u kabz eylemişdir, suâl olunup eşyâ-i mezkûreden yüz yirmi sehmden müvekkilem mezbûre Meryem’in hissesi olan yirmi bir sehmini müvekkileme teslîme mezbûre Hadîce’ye tenbîh olunmak matlûbumdur dedikde gıbbe’s-suâl mezbûre Hadîce Hatun cevâbında zevcim müteveffâ-yı mezbûr Mustafa Ağa hâl-i hayâtında ve kemâl-i akl ü sıhhatinde eşyâ-i mezbûresini bin yetmiş dokuz senesi Rebî‘ülâhiri’nin beşinci günü mahmiye-i mezbûrede Davudpaşa Mahkemesi’nde nâibü’ş-şer‘ olan Mustafa Efendi b. eş-Şeyh Mehmed Efendi tarafından irsâl olunan Mahmud Efendi’nin mahalle-i mezbûrede müteveffâ-yı mezbûrun hayâtında sâkin olduğu menzilde akd etdiği meclis-i şer‘de bana hîbe ve teslîm, ben dahi ittihâb ve tesellüm etdiğimde müteveffâ-yı mezbûr Mustafa Ağa zikr olunan eşyâyı bana hîbe ve teslîm, ben dahi ittihâb ve tesellüm etdiğimi mezbûr Mahmud Efendi’ye tahrîr etdirip mezbûr Mahmud Efendi dahi ba‘de’t-tahrîr nâib-i mezbûr Mustafa Efendi’ye i‘lâm edip hüccet olunmuş idi deyü def‘ ile mukābele [edicek] mazmûnu min-külli’l-vücûh tahrîr-i meşrûhunu nâtık ve nâib-i mezbûrun hatt ü hâtemini hâviye ve şehr-i mezbûrun beşinci günü ile müverraha hüccet-i şer‘iyyi ibrâz edicek gıbbe’s-suâl ve’l-inkâr mezbûre Hadîce’den mazmûn-ı hüccet-i mezbûreye beyyine taleb olundukda zeyl-i kitâbda muharrerü’l-esâmî olan Müslimînden Şeyh Mehmed Efendi b. el-merhûm Şeyh Adil Efendi ve Hasan Çelebi b. Adil Efendi ve İmam Salih Efendi b. Ebubekir ve İbrahim Ağa b. Memi? ve Abdullah Efendi b. Hasan nâm kimesne li-ecli’ş-şehâde [5b] meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr Mustafa Ağa hayâtında eşyâ-i mezkûresin bizim huzûrumuzda mezbûre Hadîce’ye hîbe ve teslîm, mezbûre Hadîce dahi ittihâb ve kabûl ve kabz ve tesellüm etmiş idi, biz bu mazmûn-ı hüccet-i mezbûreye bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr vech-i muharrer üzere mu‘ârazadan men‘ olunup mâ-vaka‘a bi’t-taleb ketb olundu. Şuhûdü’l-hâl: Mustafa Çelebi b. el-Hâc Ahmed, Şükrullah Bey b. Mustafa, Abdullah Çelebi b. Hüseyin, İbrahim Çelebi b. Ahmed.