Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 77 Hüküm no: 23 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Patriki Papa İstepan’ın (Emeğrili Istepanos II) borcunu teslim için Papa Anderyas’ı vekil tayin etmesi El-emru kemâ hurrire fîhi Harrerehu’l-fakîr Mustafa b. eş-Şeyh Osman el-memûru bi-istimâ‘i’l-umûri’ş-şer‘iyyeti’l-askeriye min-kıbeli men-lehü’l-emr. Mahmiye-i İstanbul’da ve tevâbi‘inde vâki‘ Ermeni tâifesinin bi’l-fi‘il patriki olup mahrûse-i Edirne’de müsâfir olan Papa İstepan v. Kirkoz nâm râhib mahrûse-i mezkûrede meclis-i şer‘-i hatîr-ı lâzımü’t-tevkīrde takrîr-i kelâm ve ta‘bîr ani’l-merâm edip işbu yedimde olan berât-ı şerîf-i âlîşânîde tasrîh olunduğu üzere kadîmden tâyife-i mezbûre patriklerine veregeldikleri rüsûm-ı âdiye-i ma‘lûmeyi tâyife-i mezkûreden ber-mûceb-i berât-ı şerîf cem‘ ü tahsîl ve kabza ve ba‘de’l-kabz rüsûm-ı mezkûreden yüz kırk bin akçesini taraf-ı mîrîye olan deynim için mahmiye-i İstanbul’da bi’l-fi‘il Şıkk-ı evvel defterdârı kāimmakāmı olan düstûr-ı mükerrem müşîr-i müfahham Mehmed Paşa hazretlerine mîrî için teslîme mahmiye-i mezkûre hısnı ebvâbından Balat kapısı dâhilinde el-Hâc İsa mahallesinde sâkin Papa Anderyas v. Abraham nâm râhibi kabûlüne mevkūfe vekâlet ile tarafımdan vekîl nasb eyledim dedikde vâki‘ hâl bi’t-taleb ketb olundu. Fi’l-yevmi’l-hâdî ve’l-ışrîn min-Cumâdelûlâ li-sene ihdâ ve semânîn ve elf. Şuhûdü’l-hâl: Ali Bey b. Abdullah el-bostânî, Mehmed Çelebi b. Abdullah, Mustafa Bey b. Ali el-cündî, İsa Bey b. Ahmed el-muhzır, Ahmed Çelebi b. Mustafa el-muhzır.