Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 77 Hüküm no: 24 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ebezade Mehmed Efendi’nin borçlarını ödemek üzere oğlunun taahhütte bulunması Hüccet, kefîl bi’l-mâl Mahmiye-i İstanbul’da Cebecibaşı mahallesi ahâlîsinden iken bundan akdem vefât eden Ebezâde demekle ma‘rûf merhûm Mehmed Efendi’nin sulbî oğlu olan umdetü’l-müderrisîn Mehmed Efendi meclis-i şer‘-i şerîf-i enverde fahrü’l-kuzât bâ‘isü’l-kitâb diğer Mehmed Efendi b. Veli muvâcehesinde ikrâr ve takrîr-i kelâm edip babam müteveffâ-yı mezbûrun merkūm diğer Mehmed Efendi’ye yedinden iştirâ ve kabz etdiği beynlerinde ma‘lûm menzil bahâsından deyni olan kırk bin akçenin yirmi bin akçesine târîh-i kitâbdan on beş sene mukaddem ben kefîl olduğumdan sonra mezbûr diğer Mehmed Efendi meblağ-ı mezbûr yirmi bin akçeyi bin seksen senesi Cumâdelâhiresi’nin yirmi üçüncü gününden bin seksen gün tamâmına değin tecîl edip ben dahi kabûl etmiş idim. Hâlâ meblağ-ı mezbûr yirmi bin akçeyi vech-i muharrer üzere müeccel deynimdir ve babam müteveffâ-yı mezbûrun semen-i mezbûrdan vech-i muharrer üzere kefîl olduğum yirmi bin akçeden mâ‘adâsı olan yirmi bin akçeyi dahi edâya ta‘ahhüd eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Cumâdelâhir li-sene ihdâ ve semânîn ve elf. Şuhûdü’l-hâl: Fahrü’l-kuzât Ahmed Efendi, Abdi Çelebi b. Hasan, Mustafa Çelebi b. el-Hâc Ahmed, Mustafa b. Ali, Ömer Efendi el-imâm, Receb Efendi b. ( ).