Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 78 Hüküm no: 25 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan Ağa’nın Yeniçeri Ocağı Kethüdası Hüseyin Ağa Vakfı’ndan borç aldığı (istiğlâl) Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden Mevlânâ Ömer Efendi b. İsmail irsâl olunup ol dahi sâbıkā İstanbul Ağası olan umdetü’l-a‘yân ve’l-ekfâ Ramazan Ağa b. Hasan Ağa’nın mahmiye-i İstanbul’da Oruç Gāzî mahallesinde vâki‘ menzillerine varıp zeyl-i rakīmde isimleri terkîm olunan bî-garaz udûl-ı Müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde mûmâ-ileyh Ramazan Ağa’nın zevce-i menkûhası Alime bt. Abdullah Efendi tarafından husûs-ı âti’l-beyâna vekîl olup zâtını ma‘rifet-i şer‘iyye ile ârifân medîne-i hazret-i Ebâ-eyyûbe’l-ensârî -Radiye anhü’l-bârî’de- Oyuncakcılar sûkunda Ferhad Paşa Türbesi kurbünde sâkin İsmail Efendi b. Rüstem ve mahmiye-i mezbûrede Laleli Çeşme kurbünde Mesihpaşa-i atîk mahallesi sâkinlerinden Derzi Üstâd Mustafa b. Abdullah nâm kimesneler şehâdetleriyle şer‘an vekâleti sâbite olan Dergâh-ı âlî dâme merci‘an li’l-e‘âlî acemilerinin yirmialtıncı bölüğü yoldaşlarının bi’l-fi‘il çorbacıları olup mahmiye-i mezbûrede Akbıyık mahallesi sâkinlerinden olan Mehmed Ağa b. Ahmed nâm kimesne meclis-i ma‘kūd-ı mezbûrda müşârün-ileyh Ramazan Ağa mahzarında ikrâr-ı tâm ve takrîr-i kelâm edip müvekkilem mûmâ-ileyhâ Alime Hatun zevci mûmâ-ileyh Ramazan Ağa ile ma‘an sâkine olduğu işbu bir tarafdan mûmâ-ileyh Ramazan Ağa’nın mülkü olan hadîka ve bir tarafdan karındaşı merkūm Mehmed Ağa veresesi mülkleri ve bir tarafdan [6a] ba‘zan tarîk-i âm ve ba‘zan umdetü’l-müderrisîni’l-kirâm Ali Efendi mülkü ve bir tarafdan tarîk-i âm ile mahdûd dâhiliye ve hâriciyesinde büyût-ı adîde ve hamam ve mahzen ve cüneyne ve kanavât-ı memlûke ile muharrere iki masura mâ-i lezîzi müştemil olan menzil mûmâ-ileyh Ramazan Ağa’nın mülk-i mahzı olup müvekkilem mûmâ-ileyhâ Alime Hatun’un menzil-i mezkûrede vechen mine’l-vücûh alâka ve medhali yokdur dedikde gıbbe’t-tasdîkı’ş-şer‘î müşârün-ileyh Ramazan Ağa meclis-i ma‘kūd-ı mezbûrda sâbıkā Dergâh-ı âlî -dâme merci‘an li’l-e‘âlî- Yeniçeri Ocağı’nda kethüdâ bey iken vedâ‘-ı âlem-i fânî eden Hüseyin Ağa Evkāfı’nın bi’l-fi‘il mütevellîsi olan umdetü’l-a‘yân ve’l-ekfâ Mustafa Ağa b. Yusuf Ağa mahzarında bi’t-tav‘i’s-sâf ikrâr u i‘tirâf edip işbu menzil-i mahdûd-ı mezkûru iki bin kıt‘a esedî guruşa mûmâ-ileyh Mustafa Ağa’ya bi-tarîkı’l-istiğlâl bey‘ ve teslîm edip ol dahi yedinde olan mâl-ı vakf-ı mezkûr ile iştirâ ve kabûl ve teslîm eyleyip semen-i mezkûr iki bin kıt‘a esedî guruşu yedinden tamâmen ahz u kabz eylediğimden sonra mütevellî-i mûmâ-ileyh Mustafa Ağa menzil-i mahdûd-ı mezkûru gıbbe’t-tahliyeti’ş-şer‘iyye ve’t-tekābuzü’l-mer‘î târîh-i kitâbdan bir sene tamâmına değin iki yüz dört kıt‘a esedî guruşa bana îcâr ve teslîm edip ben dahi istîcâr ve kabûl ve tesellüm eyledim dedikde gıbbe’t-tasdîkı’l-mu‘teber derk-i menzil-i mezkûra ve ücret-i lâzımesine merkūm Mehmed Ağa b. Ahmed kefîl ve zâmin olduğunu mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Bayram ve Mahmud Bey b. Sefer ile meclis-i şer‘-i hatîre gelip alâ-vukū‘ihi inhâ ve takrîr eyledikde mâ-vaka‘a bi’t-taleb ketb olundu. Fi’l-yevmi’s-sânî min-Cumâdelâhire li-sene ihdâ ve semânîn ve elf. Şuhûdü’l-hâl: Umdetü’l-erbâbi’t-tahrîr ve’l-kalem Abdülbaki Efendi kâtib-i fodula sâbıkā, Ahmed Ağa b. Mehmed, Ali Ağa b. Mehmed, Musa Beşe b. Ali, Ali Çelebi b. Abdullah.