Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 79 Hüküm no: 26 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer Beşe’nin Rus asıllı kölesi Ali’yi azat etmesi Dergâh-ı âlî -dâme merci‘an li’l-e‘âlî- yeniçerilerinden yirmi birinci bölüğe mahsûs odada hâlâ odabaşı kāimmakāmı olan fahrü’l-emâsil ve’l-eşbâh Sefer Beşe b. Abdullah tarafından husûs-ı âti’l-beyâna vekîl olup vekâleti zikr olunan oda yoldaşlarından Mahmud Beşe b. Mehmed ve mahmiye-i İstanbul’da Mustafa Bey mahallesi sükkânından el-Hâc Beşir b. Abdullah nâm kimesneler şehâdetleri ile sâbit olup mahmiye-i mezbûrede Sarıgez kurbünde Kanbur Mustafa Paşa Câmi‘-i şerîfi’nde hatîb olan Hüseyin Efendi b. Rasûl nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bi’l-vekâle ikrâr ve takrîr-i kelâm edip müvekkilem mezbûr Safer Beşe kendüye rıkkiyetini mu‘terif olan orta boylu açık sarı kaşlı gök elâ gözlü Rusiyyü’l-asl bâ‘isü’l-kitâb Ali b. Abdülvahab nâm abd-ı memlûkünü hasbeten li’llâhi’l-hallâk malından tahrîr ve i‘tâk ve zümre-i ahrâr-ı asliyyîne idrâc ve ilhâk eyledi. Min-ba‘d mevsûf-ı mezbûr sâir ahrâr-ı asliyyîn gibi hür olup üzerinde velâ-yı şer‘îden gayrı müvekkilimin hakkı kalmadı dedikde gıbbe’t-tasdîk ketb olundu. Fi’l-yevmi’s-sâbi‘ min-Cumâdelâhire li-sene ihdâ ve semânîn ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, Mustafa Çelebi b. el-Hâc Ahmed, Mehmed b. Ramazan, Hüseyin b. Receb, Murad Beşe b. Abdullah.