Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 80 Hüküm no: 27 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer Beşe’nin Rus asıllı kölesini azat etmesi Dergâh-ı âlî -dâme merci‘an li’l-e‘âlî- yeniçerilerinden yirmi birinci bölüğe mahsûs odada hâlâ odabaşı kāimmakāmı olan fahrü’l-emâsil ve’l-eşbâh Sefer Beşe b. Abdullah tarafından husûs-ı âti’l-beyâna vekîl olup vekâleti zikr olunan oda yoldaşlarından Mehmed Beşe b. Mehmed ve mahmiye-i İstanbul’da Mustafa Bey mahallesi sükkânından el-Hâc Beşir b. Abdullah nâm kimesneler şehâdetleri ile sâbite olup mahmiye-i mezbûrede Sarıgez kurbünde Kanbur Mustafa Paşa câmi‘-i şerîfinde hatîb olan Hüseyin Efendi b. Rasûl nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bi’l-vekâle ikrâr ve takrîr-i kelâm edip müvekkilim mezbûr Sefer Beşe kendüye rıkkını mu‘terif olan orta boylu açık sarı kaşlı gök elâ gözlü Rusiyyü’l-asl bâ‘isü’l-kitâb Yusuf b. Abdullah nâm abd-ı memlûkünü hasbeten li’l-hallâk malından tahrîr ve i‘tâk ve zümre-i ahrâr-ı asliyyîne idrâc ve ilhâk eyledi, min-ba‘d mevsûf-ı mezbûr sâir ahrâr-ı asliyyîn gibi hür olup üzerinde velâ-yı şer‘îden gayrı müvekkilimin hakkı kalmadı dedikde mâ-vaka‘a bi’t-taleb ketb olundu. Fi’l-yevmi’s-sâbi‘ min-Cumâdelâhire li-sene ihdâ ve selâsîn ve elf. Şuhûdü’l-hâl: Es-sâbikūn.