Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 80 Hüküm no: 28 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ermeni Pamuk’un oğlu Agob’un alacak iddiasından men olunması Vilâyet-i Anadolu’da Karahisar-ı şarkī kazâsına tâbi‘ İzdever nâm karye ahâlîsinden olup mahmiye-i İstanbul’da Kumkapı kurbünde değirmenci iken bundan akdem hâlik olan Pamuk? v. ( ) nâm Ermeni’nin verâseti zevce-i metrûkesi Gülürat nâm Ermeniye ile sulbî kebîr oğlu Agob ve sulbiye kebîre kızı Hanbey’e münhasıra olduğu şer‘an sâbit oldukdan sonra mezbûr Agob meclis-i şer‘-i şerîf-i enverde işbu râfi‘ü’l-vesîka Ağyar v. Manuk nâm Ermeni muvâcehesinde üzerine da‘vâ ve takrîr-i kelâm edip babam hâlik-i mezbûr Pamuk? târîh-i kitâbdan iki sene mukaddem mezbûr Ağya’ya yüz yetmiş beş esedî guruş ikrâz ve teslîm, ol dahi istikrâz ve kabz edip [6b] meblağ-ı mezbûru kable’l-ahz mezbûr Pamuk? hâlik olup meblağ-ı mezbûr isren bize intikāl ve isâbet etmeğin meblağ-ı mezbûrdan bi-hasebi’l-ırsi’ş-şer‘î bana isâbet eden hisse-i şer‘iyyemi mezbûr Ağya’dan taleb ederim, su’âl olunsun dedikde, gıbbe’s-suâl mezbûr Ağya cevâbında fi’l-vâki‘ müdde‘î-i mezbûrun mûrisi hâlik-i mezbûra cihet-i karz-ı şer‘îden yüz yetmiş beş esedî guruş edâsı lâzım deynim olup meblağ-ı mezbûru hayâtında tamâmen kendüye edâ ve teslîm, ol dahi yedimden ahz u istifâ edip hattâ hâlik-i mezbûr Pamuk? meblağ-ı mezbûru tamâmen ahz u istîfâ etdiğini şuhûd muvâcehesinde ikrâr dahi etmişdir deyü def‘le mukābele edicek gıbbe’l-istintâk ve’l-inkâr mezbûr Ağya’dan def‘-i meşrûhuna beyyine taleb olundukda udûl-ı ricalden olup mahmiye-i mezbûrede Atmeydanı’nda Acı Hamam kurbünde sâkin Kalaycı tâifesinden Mehmed b. Halil nâm kimesne ile zikr olunan Atmeydanı kurbünde Firuzağa kurbünde habbâz olan Semaven v. Arakil ve Mıgırdıç v. Karaca ve Safar v. Berihdar nâm Ermeniler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka mezbûr Pamuk? bundan akdem hâl-i hayâtında mezbûr Ağya zimmetinde cihet-i karz-ı şer‘îden olan yüz yetmiş beş esedî guruş hakkımı tamâmen ahz u istîfâ eyledim meblağ-ı mezbûrdan mezbûr Ağya zimmetinde bir akçe ve bir habbe hakkım kalmadı deyü bizim huzûrumuzda ikrâr ve bizi işhâd eyledi, biz bu husûsa şâhitleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûr Agob mu‘ârazadan men‘ olunup mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ min-Cumâdelâhir li-sene ihdâ ve semânîn ve elf. Şuhûdü’l-hâl: Mustafa Çelebi b. Ahmed, Mehmed Ağa b. Abdullah, Abdi Çelebi b. Hasan, İbrahim Çelebi b. Ahmed, Şükrullah Bey b. Mustafa.